चैत १७, काठमाडौं । अख्तियार दुरुपयोग अनुसन्धान आयोगले रामेछाप जिल्लाको लिखु तामाकोशी गाउँपालिका अध्यक्ष खड्काविरुद्ध भ्रष्टाचार मुद्दा दायर गरेको छ ।
अख्तियारले विद्युतीकरण गर्दा ४ करोड २१ लाख रुपैयाँ भ्रष्टाचार गरेको आरोपमा अध्यक्ष खड्का र तत्कालीन प्रमुख प्रशासकीय अधिकृत राजुप्रसाद न्यौपाने र टंकप्रसाद चौलागाईंसहित २७ जना विरुद्ध भ्रष्टाचार मुद्दा दायर गरेको छ ।
गाउँपालिकाको वडा नं १, ४ र ५ मा आर्थिक वर्ष २०७४ र २०७५ र २०७५र०७६ मा विद्युतीकरण गर्दा आफूहरुलाई गैरकानूनी लाभ पुग्ने र सरकारी रकममा हानिनोक्सानी पुर्याउने बदनियत राखेर अनुभव र कार्यक्षमता नभएका उपभोक्ता समितिहरुसँग विद्युतीकरण जस्तो जटिल प्रकृतिको काम गर्न योजना सम्झौता गरेको अख्तियारले दावी गरेको छ ।
अख्तियारले गाउँपालिकाका अध्यक्ष खड्काविरुद्ध ४ करोड २१ लाख रुपैयाँ विगो मागदावी गरेको छ । अख्तियारले गाउँपालिका अध्यक्ष खड्कासँगै तल्कालीन प्रमुख प्रशासकीय अधिकृत राजुप्रसाद न्यौपाने, टंकप्रसाद चौलागाईं, तत्कालिन लेखापाल दुर्गाबहादुर डिम्दोङ, उपभोक्ता समितिका अध्यक्ष बेतबहादुर पुँवार, कोषाध्यक्ष ममिता श्रेष्ठ र सचिव सुब्बा थापामगर लगायतविरुद्ध पनि भ्रष्टाचार मुद्दा दायर गरेको छ ।
उपभोक्ता समितिका नाममा भ्रष्टाचार गरेको दाबीसहित अख्तियारले विशेष अदालतमा मुद्दा दायर गरेको हो ।
