सरकारले वाङ्मय शताब्दी पुरुष सत्यमोहन जोशीको निधनमा शोक मनाउन एक दिन सार्वजनिक बिदा दिने भएको छ । जोशीलाई श्रद्धाञ्जली दिन पुगेका संस्कृति, पर्यटन तथा नागरिक उड्डयनमन्त्री जीवनराम श्रेष्ठले जोशीको निधनमा शोक व्यक्त गर्दै सरकारले सार्वजनिक विदा दिने तयारी गरेको बताएका हुन्।उनले आफुले प्रधानमन्त्री शेर बहादुर देउवासँग कुराकानी गरिसकेको र मन्त्रालयले यसबारे प्रस्ताव समेत तयार परिसकेको बताएका हुन् । सरकारले निर्णय गरेपछि सरकारी माध्यमबाट आधारिक सूचना आउने उनले बताए । हाल उनको पार्थिव शरीर श्रद्धाञ्जलीको लागि राखिएको छ । अन्तिम श्रद्धाञ्जलीपछि उनको पार्थिव शरीर अस्पताललाई नै हस्तान्तरण गरिने छ । जोशीले आफ्नो मृत्युपछि शरीरका अङ्ग दान गर्ने घोषणा गरेकोले उनको पार्थिव शरीर अस्पताललाई नै प्रदान गरिने भएको हो। जोशीको आज आइतबार बिहान ७ बजेर ९ मिनेटमा किस्ट मेडिकल कलेज तथा शिक्षण अस्पतालमा निधन भएको हो । विगत लामो समय देखि प्रोष्टेड तथा मुटुको समस्याबाट गुज्रिरहेका उनलाई कमजोरी देखिएका कारण २०७९/०६/०७ गते ईमर्जेन्सीमा ल्याई भर्ना गरिएको थियो । अस्पतलाका अनुसार उनको रगत परीक्षण गर्दा डेङ्गु संक्रमण देखिएको र छातीमा निमोनियाको संक्रमण साथै मुटुको चाल सम्बन्धी समस्या देखिएको थिए । अस्पतालले उनलाई निरन्तर अक्सिजन सपोर्टमा राखेको थियो । गत शुक्रबारदेखि औषधि चलाएता पनि शरिरले राम्रो काम नगरेको र उनको अवस्था चिन्ताजनक रहेको अस्पतालले जनाएको थियो । सँस्कृतिविद जोशी तीनपटकसम्म मदन पुरस्कार पाउने एक मात्र व्यक्तित्व हुन् ।
