काठमाडौं । मङ्सिरमा धितोपत्र दोस्रो बजारमा ३६ अर्ब ४३ करोड ४४ लाख २० हजार रुपैयाँ बराबरको ११ करोड ७९ लाख ३७ हजार ९२२ कित्ता धितोपत्र कारोबार भएको छ । नेपाल स्टक एक्सचेञ्ज (नेप्से)ले मङ्सिरमा १९ दिनको कारोबारमा उक्त रकम बराबरको धितोपत्र कारोबार भएको जानकारी दिएको हो ।
कुल कारोबारमा सर्वाधिक हिस्सा सोनापुर मिनरल्सले ओगटेको छ । मङ्सिर मा सोनापुर मिनरल्सको १ अर्ब ८१ करोड १३ लाख रुपैयाँभन्दा बढीको ५८ लाख ५५ हजार कित्ता शेयर कारोबार भएको नेप्सेको तथ्याङ्कले देखाउँछ ।
धितोपत्र दोस्रो बजारमा कात्तिक १२ गतेदेखि कारोबार शुरु भएको कम्पनीले उद्योग प्रभावित स्थानीयमा प्रतिकित्ता एक सय रुपैयाँ अंकित मूल्यमा प्रिमियमबापत १२५ रुपैयाँ थप गरी प्रतिकित्ता २२५ रुपैयाँ र सर्वसाधारणमा प्रतिकित्ता १०० रुपैयाँमा प्रिमियमबापत १३७ रुपैयाँ ५८ पैसा थप गरी प्रतिकित्ता २३७ रुपैयाँ ५८ पैसामा आईपीओ विक्री गरेको थियो ।
शुरुआती दिनमा आईपीओ खरीदकर्ता नै घाटामा रहेको कम्पनीको शेयर मूल्य पछिल्लो समय प्रतिकित्ता ४५४ रुपैयाँ १० पैसा कायम भएको छ । पछिल्लो कारोबार दिन कम्पनीको शेयर मूल्य सर्किट लेभलमा बढेको छ । मङ्सिरमा कम्पनीको शेयर मूल्य कात्तिकको तुलनामा प्रतिकित्ता १०२ रुपैयाँ ८० पैसाले बढेको छ ।
कात्तिकको अन्तिम कारोबार दिन प्रतिकित्ता २५९ रुपैयाँ रहेको कम्पनीको शेयर मूल्य मङ्सिरको अन्तिम कारोबार दिन ३६१ रुपैयाँ ८० पैसा कायम भएको थियो । मङ्सिरपछिको कारोबारमा कम्पनीको शेयर मूल्य प्रतिकित्ता ९२ रुपैयाँले बढेको छ ।
कारोबार रकमसँगै मूल्यमा पनि वृद्धि भएको हिसाबमा कम्पनीको शेयर खरीदमा लगानीकर्ताको आकर्षण बढी रहेको बुझिन्छ । मङ्सिरमा सर्वाधिक रकमको कारोबार हुने १० कम्पनीभित्र सोनापुर मिनरल्ससँगै रिलायबल नेपाल लाइफ, सिटिजन लाइफ, शिवम् सिमेन्ट, माउन्टेन इनर्जी, नेपाल पुनर्बीमा कम्पनी, सन् नेपाल लाइफ, सोल्टी होटल, सानिमा जिआईसी इन्स्योरेन्स र हाथवे इन्भेष्टमेन्ट छन् ।
मङ्सिरमा सर्वाधिक कारोबार हुने दोस्रो कम्पनी रिलायबल नेपाल लाइफको १ अर्ब २० करोड ६६ लाख रुपैयाँको कारोबार भएको छ । त्यस्तै सिटिजन लाइफको १ अर्ब ९ करोड ३६ लाख रुपैयाँ, शिवम् सिमेन्टको ९८ करोड ४८ लाख रुपैयाँ, माउन्टेन इनर्जीको ९६ करोड ८२ लाख रुपैयाँ, नेपाल पुनर्बीमा कम्पनीको ८६ करोड ८३ लाख रुपैयाँ, सन् नेपाल लाइफको ८२ करोड ८५ लाख रुपैयाँ, सोल्टी होटलको ८१ करोड ९८ लाख रुपैयाँ, सानिमा जिआईसीको ७८ करोड १३ लाख रुपैयाँ र हाथवे इन्भेष्टमेण्टको ७६ करोड ६९ लाख रुपैयाँ बराबरको शेयर कारोबार भएको हो । मङ्सिरमा सर्वाधिक कारोबार गर्ने १० कम्पनीभित्र बीमा क्षेत्रका कम्पनीको संख्या बढी छ ।
मङ्सिर २० गतेदेखि धितोपत्र दोस्रो बजार १ हजार ८३० विन्दुदेखि उकालो लागेर मङ्सिर २९ गते उक्त महीनाको अन्तिम कारोबार दिन १ हजार ९९४ दशमलव ६० विन्दुमा बन्द भएको थियो । त्यसपछिको पछिल्लो कारोबार दिन नेप्से परिसूचक २ हजार ६८ दशमलव ९० विन्दुमा कायम छ ।
सर्वाधिक कारोबार गर्ने १० कम्पनीको कारोबार रकम
स्राेत : नेपाल स्टक एक्सचेन्ज (नेप्से) ।
