जेठ ३, काठमाडौं। काठमाडौं महानगरपालिकाको मेयरको प्रतिस्पर्धामा नेपाली कांग्रेसका नेताहरूले हार स्वीकार गरेका छन् ।
एमालेको पकड भएको क्षेत्रमा बालेनलाई बढी भोट गएपनि कांग्रेसको पकड भएको क्षेत्रमा भने सिर्जनाले कमब्याक गर्ने कांग्रेस नेता कार्यकर्ताको अपेक्षा थियो ।
तर कांग्रेस सांसद समेत रहेका महामन्त्री गगन थापाको वडामै बालेन साहले कांग्रेस उम्मेदवारको भन्दा दोब्बर धेरै मत ल्याएपछि थापाले कांग्रेसको हार स्वीकार गरेका छन् ।
उनले कांग्रेसबाट कमजोरी भएको र बालेनलाई काठमाडौंका मतदाताले पत्याएको प्रतिक्रिया दिइसकेका छन् ।
थापाले मतदान गरेको वडामा ९६६ मत गणना हुँदा कांग्रेस उम्मेदवार सिर्जना सिंहले १७० मत पाउँदा स्वतन्त्र उम्मेदवार साहले करीब दोब्बर ३३७ मत ल्याएका छन् ।
यो वडामा नेकपा एमालेका केशव स्थापितले १३१ मत पाएका छन्। काठमाडौँमा अहिलेसम्म ३४ हजार ४६३ मतको गणना सम्पन्न भएको छ । जसमध्ये साहले १३ हजार २४४, स्थापितले ७ हजार ३१२ र सिर्जनाले ६ हजार ३५७ पाएकी छन् ।
केशव स्थापित र सुनिता डंगोल पासा पल्टिनेमा आशावादी
महानगरमा नेकपा एमालेबाट मेयर उम्मेदवार बनेका केशव स्थापित र उपमेयर उम्मेदवार सुनिता डंगोल भने मेयरको नतिजा आफ्नै पक्षमा आउने दाबी गरिरहेका छन् ।
काठमाडौंको भित्री क्षेत्रका वडाहरूमा मतगणना हुँदा त्याहाँबाट एमालेलाई एकलौटी भोट आउने स्थापित र डंगोलको दाबी छ ।
तर उनीहरूले भने जस्तो एकलौटी मत एमालेका वडा अध्यक्षलाई आएपनि मेयरमा नआउने अहिलेसम्मको परिणामले देखाइसकेको छ ।
किनभने वडा नम्बर १ र २ मा एमालेका वडा अध्यक्ष विजयी हुँदा पनि मेयरमा भने बालेन साहलाई नै धेरै भोट गएको छ । अहिले कांग्रेसको पकड क्षेत्रको मतगणना हुँदा पनि साहलाई आउने मत नै धेरै देखिएको छ ।
