विराटनगर । विराटनगर महानगरपालिकाले सुकुमबासीलाई व्यवस्थित गर्ने प्रक्रिया शुरू गरेको छ । विराटनगर क्षेत्रभित्र रहेका भूमिहीनलाई बोलाएर महानगरले व्यवस्थित गर्ने विषयमा छलफल गरेको हो ।
सुकुमबासी समस्यालाई दीर्घकालीन रूपमा समाधान गर्ने उद्देश्यका साथ छलफल गरिएको महानगरका प्रमुख नागेश कोइरालाले बताए । सम्बन्धित सुकुमबासीकै कुरा सुनेपछि समाधान गर्न सहज हुने भएकाले छलफल आयोजना गरेको उनले प्रस्ट पारे ।
महानगर प्रमुख कोइरालाले आफ्नो कार्यकालमा सम्भव भएसम्म सुकुमबासीलाई व्यवस्थित गर्ने प्रतिबद्धता व्यक्त गरे । बिजुली, खानेपानी, विद्यालय, खेलकुद मैदान, स्वास्थ्यचौकीलगायत आधारभूत सुविधासहितको एकीकृत बस्ती निर्माण गरेर सुकुमबासीलाई व्यवस्थित गर्ने योजना रहेको उनले बताए ।
‘हामीले व्यवस्थित गर्ने प्रयास गरेका छौं, प्रमुख कोइरालाले भने, ‘घरसहित व्यवस्थित गर्ने योजना छ । यसमा तपाईंहरूको पनि साथ चाहिन्छ । सक्नेले आर्थिक र नसक्नेले श्रमदान गर्नुपर्छ । यसो गर्दा आफूले पाएको चीजको महत्त्व र माया हुन्छ ।’ उपप्रमुख शिल्पा निराला कार्कीसमेतको उपस्थितिमा भएको छलफलमा प्रमुख प्रशासकीय अधिकृत विष्णुप्रसाद कोइरालाले छलफलको उद्देश्य उल्लेख गरेका थिए । सडक छेउछाउ निर्माण गरिएका अव्यवस्थित झुप्राझाप्रीले महानगरको सौन्दर्यमा समेत ह्रास आएको उनले बताए । छलफलमा वडा नम्बर १ का अध्यक्ष काजीबहादुर बस्नेत, २ का कुमार पोखरेल, ३ का वासुबहादुर बस्नेत, १२ हीरालाल कामत, १५ प्रकाश साह, १८ का जीतेन्द्रकुमार साह, कार्यपालिका सदस्य कमला श्रेष्ठ, सरिता घिमिरे, दीपक कर्णलगायतको उपस्थिति थियो । रासस
