काठमाडौं । सरकारले यस वर्षको शरद् याम (अटम सिजन)का लागि हिमाल आरोहण खुला गरेसँगै हालसम्म ३३९ जना पर्वतारोहीले अनुमति पाएका छन् । यो सिजनमा १० ओटा हिमाल तथा चुचुरो आरोहणका लागि पर्यटन विभागले हालसम्म उक्त संख्याका पर्वतारोहीलाई अनुमति दिएको हो ।
विभागका अनुसार ३५ दलबाट मनास्लु, रक्षा युराई, पुथा हिउचुली, कुम्भकर्ण हिमाल, हिमलुङ, नेम्जुङ, मकालु, थापा पिक, अन्नपूर्ण र धौलागिरि हिमाल आरोहणका लागि पर्वतारोहीले अनुमति लिएका छन् । कुल पर्वतारोहीमध्ये महिलाको संख्या ७३ रहेको छ । विभागले उक्त संख्याका पर्वतारोहीलाई आरोहण अनुमति दिँदा ३ करोड ६४ लाख ९९ हजार रुपैयाँ रोयल्टी संकलन गरेको छ । वसन्त याममा सगरमाथा हिमाल आरोहणमा चाप हुने गरेको छ भने यो सिजनमा मनास्लु हिमाल आरोहणका लागि आकर्षण देखिन्छ । विभागका अनुसार यो हिमाल आरोहण गर्न हालसम्म ३०१ जना पर्वतारोहीले अनुमति लिएका छन् । यो हिमाल आरोहणका लागि विभागले अनुमति दिँदा ३ करोड ४० लाख ३७ हजार रुपैयाँ रोयल्टी संकलन उठेको छ । यसपछि पर्वतारोहीको आकर्षण धौलागिरि हिमाल आरोहणमा देखिएको छ ।
पर्यटन विभागका अनुसार ३५ दलबाट मनास्लु, रक्षा युराई, पुथा हिउचुली, कुम्भकर्ण हिमाल, हिमलुङ, नेम्जुङ, मकालु, थापा पिक, अन्नपूर्ण र धौलागिरि हिमाल आरोहणका लागि पर्वतारोहीले अनुमति लिएका छन् ।
उक्त हिमाल आरोहण गर्न १० जना पर्वतारोहीले अनुमति लिएका छन् । नेपालमा यो सिजनमा पर्वतारोहण गर्न विश्वका ४७ ओटा देशका पर्वतारोहीले अनुमति पाएका छन् । ती देशमध्ये सबैभन्दा धेरै चिनियाँ रहेका छन् । हिमाल तथा पीक आरोहण गर्न ६७ जना चिनियाँ पर्वतारोहीले अनुमति पाएका छन् ।
पछिल्लो समय नेपालमा चिनियाँ पर्यटकको संख्या बढेसँगै पर्वतारोहणका लागि आउनेको संख्यामा पनि सुधार देखिएको विभागले बताएको छ । चिनियाँपछि दोस्रोमा संयुक्त राज्य अमेरिकाका पर्वतारोही रहेका छन् । त्यहाँका ३३ जना पर्वतारोहीले हिमाल आरोहणको अनुमति पाएका छन् । तेस्रोमा भने रसियाका पर्वतारोही छन् । यो सिजनका लागि २७ रसियनले अनुमति लिएका छन् । यस्तै भारतीय २४ जना रहेका छन् । अन्य देशबाट भने एकदेखि १४ जनासम्मले आरोहणको अनुमति लिएका छन् ।
