लगानी बोर्ड नेपाल र एसियाली विकास बैंक (एडीबी) को सहकार्यमा सीपीथीप्री प्रशिक्षण

सार्वजनिक–निजी साझेदारीबारे प्रशिक्षण

काठमाडौं । लगानी बोर्ड नेपाल र एसियाली विकास बैंक (एडीबी)को सहकार्यमा ‘सर्टिफाइड पब्लिक–प्राइभेट पार्टनरसिप प्रोफेसनल’ (सीपीथीप्री) प्रशिक्षण कार्यक्रम सोमवारदेखि काठमाडौंमा प्रारम्भ भएको छ । प्रशिक्षणमा विभिन्न मन्त्रालय तथा लगानी बोर्डको कार्यालयका अधिकारीहरू र परामर्शदाता सहभागी रहेको लगानी बोर्डको कार्यालयले बताएको छ । उक्त प्रशिक्षण कार्यक्रममा कर्मचारी र परामर्शदातालाई सार्वजनिक–निजी साझेदारी (पीपीपी) मोडलमा सञ्चालन हुने परियोजनाबारे विस्तृत जानकारी गराउने उद्देश्य रहेको बोर्डले बताएको छ । ‘बोर्डले सार्वजनिक–निजी साझेदारीका परियोजना तयारी, विकासकर्ता छनोट तथा परियोजना व्यवस्थापनसम्बन्धी दक्षता अभिवृद्धि गर्ने उद्देश्य राखेको छ । यसले पीपीपीका नवीनतम अवधारणासहितका परियोजना कार्यान्वयनमा सहयोग पुग्ने अपेक्षा गरिएको छ,’ लगानी बोर्डद्वारा जारी प्रेस विज्ञप्तिमा उल्लेख छ । लगानी बोर्डका प्रमुख कार्यकारी अधिकृत सुशील भट्टले पीपीपी परियोजना कार्यान्वयनका लागि लगानी बोर्डको कार्यालय विशिष्टीकृत निकाय भएकाले कर्मचारीका लागि यस्तो प्रशिक्षण आवश्यक रहेको बताए । ‘पीपीपी अवधारणाका परियोजना सफलतापूर्वक अघि बढाउन परियोजनाको तयारी, जोखिम न्यूनीकरण, खरीद प्रक्रिया एवं कार्यान्वयन तथा सञ्चालनका सम्पूर्ण चक्रमा दक्षता र विशेषज्ञता आवश्यक पर्छ,’ उनले भने । परियोजना विकासमा पीपीपी अवधारणा आफैमा जटिल विषय रहेको चर्चा गर्दै प्रमुख कार्यकारी अधिकृत भट्टले यसका लागि सबल जनशक्ति आवश्यक रहेको उल्लेख गरे । पीपीपी सर्टिफिकेसन कार्यक्रममा आधारभूत, तयारी र कार्यान्वयन गरी तीन चरण समावेश छन् । अहिले आयोजना भइरहेको कार्यक्रम आधारभूत चरणअन्तर्गतको हो ।