भैरहवामा निर्माण गरिएको गौतमबुद्ध अन्तर्राष्ट्रिय विमानस्थलमा यान्त्रिक परीक्षण उडान (क्यालिब्रेशन फ्लाइट) सम्पन्न भएको छ । योसँगै उडानसँग सम्बन्धित सम्पूर्ण प्राविधिक काम पनि सम्पन्न भएको नेपाल नागरिक उड्डयन प्राधिकरणका महानिर्देशक इन्जिनियर प्रदीप अधिकारीले जानकारी दिए । एरो थाईको जहाजले क्यालिब्रेशन उडान गरेको हो । यो उडानको प्रतिवेदन अन्तर्राष्ट्रिय नागरिक उड्डयन सङ्गठन (आइकाओ) लाई पठाएपछि आइकाओले स्वीकृति दिएपछि व्यावसायिक उडान हुन्छ । आगामी वैशाख १ गतेदेखि अन्तर्राष्ट्रिय परीक्षण उडान, जेठ २ गते बुद्धपूर्णिमादेखि व्यावसायिक उडान सुरु गरिने महानिर्देशक अधिकारीले जानकारी दिए । संस्कृति, पर्यटन तथा नागरिक उड्डयन मन्त्रालयका सचिव महेश्वर न्यौपानेले छिटोभन्दा छिटो व्यावसायिक रूपमा सञ्चालनमा ल्याउन निर्देशन दिएका छन्।
भैरहवा-गौतमबुद्ध अन्तर्राष्ट्रिय विमानस्थलबाट २०७९ वैशाख महिना भित्रै व्यावसायिक उडान (अन्तर्राष्ट्रिय उडान) सुरु गर्ने जनाइएको छ ।क्यालिब्रेशन फ्लाइटको तयारी भइरहेको विमानस्थलको उदघाटन २०७९ जेठ २ गते सोमबार बुद्ध जयन्तीका दिन गर्ने लक्ष्य रहेको संस्कृति, पर्यटन तथा नागरिक उड्डयन मन्त्री प्रेम आलेले भैरहवामा बताए । उद्धघाटन अघि नै चार्टड उडान सुरु गर्ने योजना सरकारको रहेको छ । […]
