मर्जर तथा प्राप्ति प्रक्रिया पूरा गरी बैंकहरूले एकीकृत कारोबार शुरू गरेको लामो समय बितिसक्दा पनि तिनको शेयर कारोबार खुलाउन ढिलासुस्ती भएको पाइएको छ । मर्जर र प्राप्तिको नाममा लामो समयसम्म शेयर कारोबार रोक्का हुँदा लगानीकर्ता मर्कामा परेको भन्दै व्यापक विरोध भएपछि नेपाल धितोपत्र बोर्डले मर्जर तथा प्राप्तिसम्बन्धी निर्देशिका २०७९ लागू गरेको थियो । निर्देशिकाले एकीकृत कारोबार शुरू गरेको बढीमा शेयर कारोबारको १५ दिनमात्र किनबेच रोक्का गर्ने व्यवस्था गरेको छ । तर, पुसमा एकीकृत कारोबार शुरू गरेका बैंकले फागुन लाग्दासमेत शेयर कारोबार खुलाउने लक्षण देखाएका छैनन् ।
कारोबार रोक्का अवधिमा शेयर बजारमा निकै उतारचढाव आइसकेको छ । यस्तो बेला बजारमा शेयर किनबेच नहुँदा लगानीकर्ता मर्कामा परेका छन् । त्यतिमात्र होइन, शेयर बेचेर गर्जो टार्नुपर्ने लगानीकर्ताको शेयर बन्धकमा परेको छ । सबैभन्दा बढी शेयर भएका बैंकहरूको शेयर कारोबार रोक्का हुँदा ठूलो संख्यामा लगानीकर्ता मर्कामा परेका हुन् । लगानीकर्ताको व्यापक असन्तुष्टि र विरोधकै कारण नेपाल राष्ट्र बैंक र नेपाल धितोपत्र बोर्ड दुवैले आवश्यक कानूनी प्रक्रिया पूरा गरेर शेयर कारोबार खुलाउने वातावरण बनाएका हुन् । मर्जर तथा प्राप्तिमा गएका बैंकले शेयर स्वाप मिलाउन तथा कसैले बोनस शेयरको हिसाब मिलान गर्न समय लागेको भनेर शेयर कारोबार खुलाउन ढिला गरेका छन् ।
छिटोछरितो कारोबार खुलाउन तदारुकता नदेखाउनु शेयरधनीप्रतिको बेवास्ता हुने भएकाले यसमा गम्भीर ध्यान जान आवश्यक हुन्छ । सर्वसाधारण शेयरधनीले सञ्चालक समितिसमक्ष आफ्नो गुनासा राख्न सहज छैन । यस्तोमा समितिले आफै आफ्ना शेयरहोल्डरप्रति जिम्मेवार बनेर छिटोभन्दा छिटो शेयर कारोबार खुलाउनुपर्छ । शेयरबजारमा लगानीकर्ताको आकर्षण हुनुका कारण नै यसमा भएको तरलता हो । आफूलाई आवश्यक परेका बेला बजारमा बेचेर गर्जो टार्न पाइन्छ र बजारबाट लाभ पनि लिन सकिन्छ भन्ने लगानीकर्ताको विश्वास हुन्छ ।
