आगामी बैशाखमै स्थानीय तहको निर्वाचन गर्न प्रमुख सत्ता घटक नेपाली काँग्रेस र माओवादी केन्द्र सहमत भएका छन् । वैशाख अन्तिम साता चुनाव गर्ने गरी मिति तोक्न लागिएको हो । ७५३ स्थानीय तहका जनप्रतिनिधिको ५ वर्षे कार्यकाल आगामी जेठ ५ गते सकिने भएकाले त्यो भन्दा अगाडी नै नयाँ जनप्रतिनिधि ल्याईसक्नुपर्ने बाध्यता भएका कारण बैशाखमै चुनाव गराउन लागिएको हो । निर्वाचन आयोगले बोलाएको सर्वदलीय बैठकमा विपक्षी एमाले सहितका दलले जेठ ६ गते नयाँ जनप्रतिनिधि आउने गरी निर्वाचन गराउने गरी मिति तोक्न सरकारलाई आग्रह गरेका थिए । निर्वाचन आयोगलाई चुनाव गराउन मिति तोकिएपछि १२० दिन समय लाग्छ । तर, १२० दिनको समय नराखी १ सय दिन मात्रै राखेर मिति तोक्न लागिएको सरकारका एक मन्त्रीले जानकारी दिए । बिहीबार बस्ने मन्त्रिपरिषद बैठकले स्थानीय तहको निर्वाचनको मिति तोक्ने ती मन्त्रीको भनाई छ । आयोगले माघ पहिलो हप्तासम्म निर्वाचनको मिति तोक्न आग्रह गरेको थियो । देउवा–प्रचण्ड भेटले गरेको शुभ संकेतयसअघि सम्म बैशाखमै स्थानीय तहको निर्वाचन हुनेमा धेरैले आशंका व्यक्त गर्दै आएका थिए । एमालेबाट विभाजन भएर बनेको नेकपा एकिकृत समाजवादीले तल्लो तहसम्म कमिटी नै निर्माण गर्न नसकेका कारण उसलाई ‘कम्फर्टेबल’ नभई निर्वाचनको मिति तोकिँदैन भन्ने आशंका पनि थिए । एमाले अध्यक्ष केपी शर्मा ओलीले त २०५९ साल दोहोर्याउने खेल भईरहेको आरोप नै लगाए । तर, यी सब आशंका र आरोपलाई चिर्दै प्रधानमन्त्रीसमेत रहेका काँग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डबीच भएको भेटले स्थानीय निर्वाचन नधेकेल्ने समझदारी गरेको छ । देउवा र प्रचण्डबीच बालुवाटारमा भएको छलफलपछि स्थानीय तहको निर्वाचन तोकिएकै मितिमा गर्ने समझदारी बनेको बताईएको छ । ‘संविधानमा उल्लेख भएको व्यवस्थाको खिलापमा जाने कुरा भएन’ प्रचण्डले प्रधानमन्त्रीलाई दिएको सुझाव उधृत गर्दै स्रोत भन्छ, ‘रामचन्द्र जीको नेतृत्वमा रहेको सरकार सञ्चालन संयन्त्रको बैठक राखौँ, गठबन्धनको बैठक पनि राखौँ र एउटा समझदारी बनाएर मिति तय गरौँ । त्यसलाई तपाईले क्याबिनेटबाट सदर गराईदिनुहोला ।’निर्वाचन आयोगले वैशाख १४ र २२ गते गरी २ चरणमा निर्वाचन गर्न सकिने प्रस्ताव गरे पनि बैशाखको अन्तिम तिर मात्रै निर्वाचन गर्ने तयारी सरकारको छ । यदि, बिहीबारको मन्त्रिपरिषद बैठकले स्थानीय तहको निर्वाचनको मिति तोकेको खण्डमा देश निर्वाचनमय हुनेछ ।
