खाद्य व्यवस्था तथा व्यापार कम्पनी लिमिटेडले जिल्लाका सातवटै गाउँपालिका खाद्यान्न बिक्रीको व्यवस्था गरेको छ । लिमिटेडको सिमकोटस्थित शाखाको गोदामबाट गाउँगाउँमा खाद्यान्न लैजान समस्या भएपछि सम्बन्धित गाउँपालिकामै बिक्रीको व्यवस्था गरिएको हो ।
नाम्खा गाउँपालिकाका अध्यक्ष विष्णुबहादुर लामाले पालिका केन्द्र याल्वाङ र लिमीमा गरी दुईवटा बिक्री केन्द्र स्थापना गरिएको बताउनुभयो । बिक्री केन्द्रको स्थापनासँगै अब तीन दिन पैदल हिँडेर खाद्यान्न लिनुपर्ने बाध्यता हटेको छ । यसरी सिमकोटस्थित गोदामबाट लिइएको खाद्यान्नको ढुवानी स्वयं सेवाग्राहीले बेहोर्नुपर्ने हुन्थ्यो । सम्बन्धित गाउँपालिकामा डिपो तथा बिक्री केन्द्र स्थापनाले ढुवानीका लागि छुट्टै लागत सेवाग्राहीले बेहोर्नु नपर्ने भएको छ ।
