प्रायजसो सरकारहरू बजेटलाई शास्त्रीय रूपमा सोच्ने गर्दछन् । जसअनुसार बजेट सरकारको वित्तीय गुरु योजना हो । जसमा अनुमानित आय, प्रस्तावित खर्चका आधारमा गरिनु पर्ने कार्यहरू र त्यसका लागि आवश्यक साधन, स्रोतको व्यवस्था गरिएको हुन्छ । तर आधुनिक अर्थमा बजेट एक आर्थिक वर्षको आर्थिक दर्शन, नीति, प्राथमिकता र स्रोत साधनको समष्टिका अर्थमा लिइन्छ । यस आधारमा बजेट समस्त अर्थतन्त्रलाई चलायमान बनाउने आधार हो । बजेटमा अर्थतन्त्रका सम्पूर्ण आर्थिक व्यवहारलाई अपेक्षित रूपमा गतिशील बनाउन सक्ने शक्ति रहनु पर्दछ, एकसाथ सबै आर्थिक पात्रमा आशा, भरोसा र उत्साह सिर्जना गर्न सक्नुपर्छ । अन्यथा बजेट सरकारी कोष व्यवस्थापन सिवाय केही हँुदैन ।
