परिसंघको पर्यटन समिति गठन, खोप लगाएकालाई क्वारेन्टाईनमा नराख्न माग

हवाई भाडा घटाएर पर्यटन उद्योग प्रतिस्पर्धी बनाउन परिसंघको माग

काठमाडौं । नेपाल उद्योग परिसंघले हवाई भाडा घटाएर नेपालको पर्यटन उद्योग प्रतिस्पर्धी बनाउन संस्कृति, पर्यटन तथा नागरिक उड्डयनमन्त्री सुदन किरातीसँग माग गरेको छ । मन्त्रालयमा आयोजित बधाई तथा शुभकामना कार्यक्रममा परिसंघले नेपालको पर्यटन प्रवर्द्धनका लागि चालिनुपर्ने  कदम,  यूरोपियन यूनियनले राखेको सुरक्षा सूचीबाट हटाउन गरिनुपर्ने पहलसहित तत्कालीन एवं दीर्घकालीन रूपमा गरिनुपर्ने नीतिगत सुधारका विषयमा जानकारी गराएको हो । परिसंघका उपाध्यक्ष राजबहादुर शाहले परिसंघले नेपालको पर्यटन क्षेत्रलाई उच्च प्राथमिकतामा राखेर समिति गठन गरेको जानकारी गराए । उनले नेपालको हवाई भाडा अत्यन्त महँगो हुँदा नेपाल उत्कृष्ट पर्यटकीय गन्तव्य हुँदाहुँदै पनि अपेक्षाकृत रूपमा विदेशी पर्यटक आउन नसकिरहेको बताए । उनले हवाई भाडा घटाउनेतर्फ आवश्यक पहल गर्न, राष्ट्रिय ध्वजावाहक नेपाल वायुसेवा निगमलाई प्रतिस्पर्धी बनाउन र यूरोपियन युनियनले नेपाललाई राखेको सुरक्षासूचीबाट हटाउन आवश्यक पहलका लागि मन्त्री राईको ध्यानाकर्षण गराए । परिसंघका उपाध्यक्ष वीरेन्द्रराज पाण्डेले परिसंघले सरकारसँग मिलेर अर्थतन्त्र विस्तारमा काम गर्दै आएको बताए । पर्यटन उद्योगलाई अगाडि बढाउन सरकारसँग सहकार्य गर्न परिसंघ तयार रहेको उनको भनाइ थियो । परिसंघका पर्यटन समिति सभापति पम्फा धमलाले पर्यटन उद्योगलाई अन्य उद्योगसरह पाउने सुविधा दिन आग्रह गरिन् । अन्तरराष्ट्रिय गन्तव्यमा प्रभावकारी एवं देखिनेगरी नेपालको प्रवर्द्धन अभियान सञ्चालन गरिनुपर्ने उनले बताइन् । परिसंघले पोखरा अन्तरराष्ट्रिय विमानस्थल र गौतमबुद्ध अन्तरराष्ट्रिय विमानस्थल सफल रूपमा सञ्चालनका लागि हवाई रुटको अभाव एवं  चुनौतीबारे पनि मन्त्रालयको ध्यानाकर्षण गराएको छ । नेपालमा भारतीय पर्यटकले ल्याउन पाउने नगदको सीमा हटाउन आवश्यक पहल गर्न, नेपाललाई फिल्मिङ गन्तव्यको रूपमा विकास एवं प्रवर्द्धन गर्न, नेपाल विवाहका लागि उत्कृष्ट गन्तव्य हुन सक्ने भएकाले विवाहका लागि गरगहना ल्याउन तथा लैजान पाउने व्यवस्थामा सहजीकरण गरिदिन पनि आग्रह गरिएको छ । भेटवार्तामा मन्त्री किरातीले नीतिगत सुधारका विषयमा परिसंघले दिएको सुझावको स्वागत गरे । यूरोपियन यूनियनको सुरक्षा सूचीबाट हटाउने सन्दर्भमा पहल शुरू गरिसकेको उनले बताए ।