स्थानीय तहमा जनप्रतिनिधि निर्वाचित भएको पाँच वर्ष पुग्न लागेको छ । हाल बहाल रहेका स्थानीय जनप्रतिनिधिको निर्वाचन २०७४ साल वैशाख ३१ गते, असार १४ गते र असोज २ गते गरी तीन चरणमा भएको थियो । स्थानीय तहका जनप्रतिनिधिको पदावधि पाँच वर्षको रहने भएकाले निर्धारित समयमै स्थानीय तहको निर्वाचन गर्न आवश्यक छ । संविधान सभाले संविधान जारी गरेपछि स्थानीय तहको पुनर्संरचना गरियो । नयाँ पुनर्संरचनाअनुसार खडा भएका ७५३ स्थानीय तह र तिनका छ हजार ७४३ वडाका विभिन्न पदमा निर्वाचन गरिएको थियो । पहिलो चरणमा प्रदेश ३, ४ र ६ का २८३ स्थानीय तहमा निर्वाचन भएको थियो । दोस्रो चरणमा प्रदेश १, ५ र ७ का ३३४ स्थानीय तह र तेस्रो चरणमा प्रदेश २ का १३६ स्थानीय तहमा निर्वाचन गरी स्थानीय निर्वाचन सम्पन्न गरिएको थियो । पहिलो चरणको निर्वाचनको मिति र त्यसपछि आयोगले दिएको थप एक साता समयका आधारमा हाल बहाल रहेको स्थानीय जनप्रतिनिधिको पाँच वर्षे कार्यकाल सकिन अब चार महिना पनि बाँकी छैन ।
