काठमाडौं । चालू आर्थिक वर्ष २०७८/७९ को पहिलो ३ महिनामा नेपालको वैदेशिक व्यापार कुल रू. ५ खर्ब ४५ अर्ब ५७ करोड पुगेको छ । नेपालले १३२ देशसँगको व्यापारमा रू. ४ खर्ब ७८ अर्ब ५२ को वस्तु तथा सामग्रीहरू ३ महिनामा आयात गरेको छ ।
भन्सार विभागले सोमवार सार्वजनिक गरेको तथ्याङ्कअनुसार पहिलो ३ महिनामा वैदेशिक व्यापारमा गत वर्षको तुलनामा वृद्धि भएको छ । कुल वैदेशिक व्यापार ६८ दशमलव १३ प्रतिशतले बढेको छ । गत वर्ष यही अवधिमा कुल व्यापार रू. ३ खर्ब २३ अर्ब ३१ करोड थियो ।
नेपालको निर्यातमा वृद्धि भएको तथ्याङ्कले देखाउँछ । नेपालबाट चालू आवको यस अवधिमा रू. ६५ अर्ब ५ करोडको वस्तु तथा सेवा निर्यात भएको छ । गत वर्ष सोही अवधिमा नेपालले रू. ३१ अर्ब ४ करोडका वस्तुहरू निर्यात गरेको थियो । गत वर्ष २०७७/७८ को तुलनामा निर्यात १०९ दशमलव ५४ प्रतिशतले बढेको छ ।
समीक्षा अवधिमा व्यापार घाटा ५८ प्रतिशतले बढेको छ । विभागको तथ्याङ्कअनुसार चालू आवको पहिलो त्रैमासको व्यापार घाटा रू. रू. ४ खर्ब १३ अर्ब रहेको छ । गत आवको यही अवधिमा यस्तो घाटा रू. २ खर्ब ६१ अर्ब थियो । चालू आवको ३ महिनामा नेपालबाट रू. २२ अर्ब २ करोड मूल्यको भटमासको तेल निर्यात भएको छ । रू. ४ अर्ब ८५ करोडको पाम तेल निर्यात भएको छ ।
चालू आवको प्रथम त्रैमासमा रू. २ अर्ब ४५ करोड मूल्यका कार्पेट, टेक्स्टायल जस्ता वस्तुहरूको निर्यात भएको छ । नेपालले यो अवधिमा पेट्रोलियम पदार्थ, स्टील, मेसिनरी पार्टपुर्जाहरू बढी आयात गरेको छ । चालू आवको असोजसम्ममा रू. १२ अर्ब ८६ करोड मूल्यको पेट्रोल र रू. २३ अर्ब ३२ करोड मूल्यको डिजेल नेपालले आयात गरेको छ । रू. १७ अर्ब मूल्यको खाद्य वस्तु आयात गरेको छ ।
चालू आवको पहिलो महिना साउनमा नेपालको कुल वैदेशिक व्यापार रू. १ खर्ब ७१ करोड मूल्य बराबर रहेको थियो । त्यस अवधिमा नेपालले रू. २० अर्ब ७६ करोडका वस्तुहरू निर्यात गरेको थियो भने रू. १ खर्ब ५० अर्बको आयात गरेको थियो । भदौ महिनामै कुल वैदेशिक व्यापार रू. ३ खर्ब ५८ अर्ब पुगेको थियो । भदौमा नेपालको निर्यात रू. ४४ अर्ब ३ करोड पुगेको थियो । गत आवको तुलनामा यो चालू आवमा नेपालको निर्यात अवस्थामा सुधार देखिएको छ ।
