विश्वभरि नै कोरोना भाइरस (कोभिड–१९) को त्रासदी व्याप्त छ । संसारको लगभग सबै ठाउँमा कोरोना महामारीको चर्चा–परिचर्चा नै भइरहेको छ । पृथ्वीभरिका मानिसहरूले यस रोगको कहर सामना गर्दैछन् । कोरोना भाइरसको संव्रmमण सबैभन्दा पहिले चिनियाँ सहर वुहानमा फैलियो । यो सहरमा करिब १ करोड १० लाख जनसंख्या छ । वुहान सहर एक व्यापारिक स्थान भएको हुँदा यहाँ धेरै अरू क्षेत्रका मानिसहरूको पनि आवतजावत हुने हुँदा अन्य सहरहरूमा पनि यो रोगको विस्तार भएको बुझिन्छ । यसका धेरै प्रकारमध्ये हालसम्म मानिसमा सात प्रकारका कोरोना भाइरसको संक्रमण देखिएको छ । सन् २०१९ डिसेम्बर महिनामा छिमेकी देश चीनमा पत्ता लागेको नोबल कोरोना भाइरस, कोरोना समूहको नयाँ प्रजाति हो । यसमा सार्स, मर्स र नोबल कोरोना भाइरसचाहिँ भर्खरै पत्ता लागेका हुन । कोरोना भाइरसका ८० प्रतिशत लक्षण सार्ससँग मिल्ने सम्बन्धित क्षेत्रका स्वास्थ्य अधिकारीहरूले बताएका छन् ।
