वैशाख ४, काठमाडौं । २०७९ सालको पहिलो कारोबार दिन आइतवार नेप्से परिसूचक २९ दशमलव ६० अंकले घटेको छ । परिसूचक २ हजार ३८५ दशमलव ६४ विन्दुमा झरेको हो ।
चैत ३० गते बुधवार ३० दशमलव २४ अंक बढेर २ हजार ४१५ दशमलव २४ विन्दुसम्म पुगेको थियो । पछिल्लो सयम समग्र देशकै अर्थतन्त्र नकारात्मक रहेको भन्दै टिकाटिप्पणी हुन थालेसँगै शेयरबजारमा नकारात्मक असर परेको देखिन्छ । यसोत वित्तीय प्रणालीमा तरलता अभाव नै छ यसले गर्दा पनि शेयर बजार घटेको हो ।
बजार घट्दै जादा भने कारोबार रकम घटेको छ । यसबाट के बुझिन्छ भने अब लगानीकर्ता सस्तो भाउमा शेयर बेच्न चाहेका छैनन् भने खरीद गर्नेको पनि पर्ख र हेरको अवस्था सृजना भएको छ । यसले गर्दा पनि कारोबार रकम घटेको हो । सोही कारण अब बजारमा विस्तारै खरीदकर्ता आउने अनुमान लगाउन सकिन्छ ।
केही समय यस्तै चक्र चलेर अब बजारले विस्तारै गति लिने शेयर विश्लेषकहरुले बताउँछन् । कम्पनीको शेयरमूल्य धेरैनै तल आएको छ । वैशाख महीना लागेसँगै सूचीकृत कम्पनीहरुले वित्तीय विवरण सार्वजनिक गर्नेछन् । यसले गर्दा विस्तारै बजार बढ्ने देखिन्छ । लगानीकर्ताले सोही अनुसार आफ्नो लगानी रणनीति बनाएर लगानी गरेमा राम्रो प्रतिफल प्राप्त हुने देखिन्छ ।
आइतवार कारोबारमा आएका २३३ धितोपत्रमध्ये नेष्डो समृद्ध लघुवित्तको शेयरमूल्यमा सकारात्मक सर्किट लागेको छ । कम्पनीको शेयरमूल्य अघिल्लो कारोबार दिनको तुलनामा १० प्रतिशत वृद्धि भएसँगै सकारात्मक सर्किट लागेको हो । शेयरमूल्य प्रतिकित्ता रू. २ हजार ४८८ दशमलव ९० पुगेको छ । त्यसैगरी दोस्रोमा जाल्पा सामुदायिक लघुवित्त वित्तीय संस्थाको शेयरमूल्य ४ दशमलव ३ प्रतिशत वृद्धि भएर रू. ५४२ दशमलव १० पुगेको छ ।
त्यसैगरी, आइतवार हिमालयन उर्जा विकास कम्पनीको शेयरमूल्यमा नकरात्मक सर्किट लागेको छ । कम्पनीको शेयरमूल्य अघिल्लो कारोबार दिनको तुलनामा १० प्रतिशत घटेसँगै नकरात्मक सर्किट लागेको हो । सर्वाधिक शेयर खरीद विक्री नेपाल दूरसञ्चार कम्पनीको भएको छ । कम्पनीको रू. ४ करोड ९९ लाख बराबरको शेयर खरीदविक्री भएको हो ।
