म्याग्दी । पूर्वाधार निर्माणसँगै धवलागिरि गाउँपालिका–७ स्थित ताकमकोतमा धार्मिक पर्यटक बढेका छन् । यहाँको प्रमुख शक्तिपीठ मानिने ताकमकोतमा दर्शन र अवलोकनका लागि आउने धार्मिक पर्यटक बढेको ताकमकोतका पुजारी हेमनाथ पौडेलले बताए ।
‘दुई वर्षअघिसम्म सुनसान हुने गर्दथ्यो,’ उनले भने, ‘अहिले दैनिकजसो दर्शनार्थी आउँछन् ।’ नजिकका भक्तजन सडकमार्ग भएर गाडीमार्फत र टाढाका हेलिकोप्टर चढेर आउन थालेको उनले बताए । जगन्नाथ, अन्नपूर्ण, दुर्गालगायत देवी–देवताको मूर्ति रहेको यहाँ नवदुर्गा, जेष्ठी पूर्णिमा, मङ्सिर पूर्णिमा, चैत्राष्टमी पर्वका अवसरमा विशेष मेला लाग्ने गर्छ ।
ताकम र देवीस्थान हुँदै कोत परिसरमा पुग्ने दुई सडक निर्माण भएका छन् । सडकबाट कोतसम्म पुग्ने पैदलमार्ग निर्माण गरिएको छ । १२४६ देखि १५४५ सम्म बगाले थापाको र १५४६ देखि १८८२ सम्म मल्ल राजाले कोतघरका रूपमा समेत प्रयोग भएको उक्त मन्दिरमा ऐतिहासिक महŒवका तोप, तरबार, खुँडा, खुकुरी, ढाललगायत हातहतियार छन् ।
समुद्री सतहबाट दुई हजार ५०० मिटरको उचाइमा अवस्थित ताकमकोतबाट गुर्जा, धवलागिरि, नीलगिरि, अन्नपूर्ण र माछापुच्छ्रे हिमशृंखलाका साथै मनोरम पहाडी भूगोल, ग्रामीण बस्ती र सूर्याेदयको दृश्यावलोकन गर्न सकिन्छ । स्वदेश तथा विदेशमा रहेका ताकम र आसपासका गाउँका बासिन्दाबाट चन्दा जुटाएर करीब ८० लाखमा दुई वर्षअघि ताकमकोतको कोतघर र अन्नपूर्ण–जगन्नाथ मन्दिरको पुनर्निर्माण गरिएको थियो । सोह्रौँ शताब्दीमा निर्माण गएिको ताकमकोत १९९० र २०७२ सालको भूकम्पका कारण जीर्ण बनेको थियो ।
ताकमकोतको एकीकृत विकास गर्ने उद्देश्यले तयार पारिएको गुरुयोजनानुसार पहिलो चरणमा कोतघर, अन्नपूर्ण–जगन्नाथ मन्दिर, सत्तल र सार्वजनिक शौचालय निर्माण गरिएको पुनर्निर्माण समितिका अध्यक्ष तेजेन्द्र थापाले बताए । दुई करोड ५० लाख लागत अनुमान गरिएको गुरुयोजना कार्यान्वयनका क्रममा हालसम्म एक करोड ५० लाखभन्दा बढी खर्च भएको जानकारी उनले दिए । यसमा धवलागिरि गाउँपालिका र पर्यटन मन्त्रालयले पनि लगानी गरेको उनले बताए । रासस
