माघ १५, काठमाडौं । नेपाल सिमेन्ट उत्पादक संघले खानी तथा भूगर्भ विभागका महानिर्देशक रामप्रसाद घिमिरेसहित सिमेन्ट उद्योगीहरूविरुद्ध भ्रष्टाचारको मुद्दा दायर भएको विषयमा आपत्ति प्रकट गरेको छ ।
गैरकानूनी रुपमा चुनढुंगा खानी उत्खनन गरी राजस्व हिनामिना गरेको कसूरमा खानी तथा भूगर्भ विभागका महानिर्देशकसहित ९ जना कर्मचारी, नेपाल उद्योग वाणिज्य महासंघका पूर्व अध्यक्ष पशुपति मुरारकासहित ९ जना सिमेन्ट उद्योगी गरी १८ जनाविरुद्ध मुद्दा दायर भएको विषयमा उसले गम्भिर ध्यानाकर्षण भएको पनि बताएको छ ।
उनीहरुमाथि १ अर्ब २४ करोड ४५ लाख रुपैयाँ बराबर राजस्व हिनामिना गरेको आरोपसहित अख्तियार दुरुपयोग अनुसन्धान आयोगले गत बुधवार विशेष अदालतमा मुद्दा दायर गरेको थियो ।संघले शुक्रवार प्रेस विज्ञप्ति जारी गर्दै ‘उद्योगीहरुलाई भ्रष्टाचार मुद्दामा मुछ्नु कानूनसम्मत र न्यायोचित नदेखिएको’ भनेको छ ।
‘उद्योगहरुमाथि तथ्यहीन रुपमा ठूलो क्षति भयो भन्ने आरोप लगाउने किसिमको क्रियाकलापले ठूलो आघात पर्न जाने र समग्र उद्योग तथा नयाँ लगानीकर्तामा समेत नकारात्मक प्रभाव पर्न जाने’ विज्ञप्तिमा उल्लेख छ ।
आत्मनिर्भरउन्मुख सिमेन्ट उद्योगलाई व्यवसाय गर्न दूरुत्साहित गर्नेगरी भ्रष्टाचार मुद्दामा मुछिएको पनि संघले बताएको छ ।
‘कानून बमोजिम लाग्ने राजस्व तथा रोयल्टी भुक्तानी गरी राष्ट्र पुनर्निर्माणको परिस्थितिमा उद्योगलाई आवश्यक कच्चापदार्थ बढी उत्खनन् गरेको कारणले मात्र निराधार रुपमा उद्योग र उद्योगीलाई हतोत्सायी गर्नेगरी भ्रष्टाचार जस्तो गम्भीर आरोप लगाइएको’, संघको विज्ञप्तिमा उल्लेख गरिएको छ ।
त्यस्तै, संघले उद्योगी व्यवसायीहरुले सबै काम कानूनसम्मत रुपमा गरेको भन्दै उनीहरुको बचाउसमेत गरेको छ ।
यो पनि हेर्नुस् :
सिमेन्ट उद्योगीमाथि भ्रष्टाचारको मुद्दा : कानूनविपरीत र निराधार भएको उद्योगीको भनाइ
