फागुन ५, न्यूयोर्क (अमेरिका) । अन्तरराष्ट्रिय बजारमा बिहीवार पहेंलो धातु सुनको भाउ बढेको छ ।
युक्रेन–रुसबीचको तनाव बढेको खबरहरु सार्वजनिक भएपछि बिहीवार शुरुआती कारोबारदेखि नै सुनको भाउ उकालो लागेको थियो । पूर्वी युक्रेनमा बमबारी भएको भन्दै रुसी सञ्चार माध्यमहरुले समाचार छापेपछि लगानकिर्ताहरु लगानीका लागि सुरक्षित मानिने सुन लगायत सेफ हेभन एसेटतर्फ लागेपछि सुनको भाउले टेवा पाएको हो ।
न्यूयोर्क मर्कन्टाइल एक्सचेञ्जको कोमेक्स डिभिजनमा बिहीवार स्पट गोल्डको भाउ उच्चतम् प्रतिऔंस १ हजार ८९६ डलर ५९ सेन्टसम्म पुगेको थियो । यो गत वर्षको जुनयताकै सर्वाधिक उच्च हो ।
यो समाचार तयार पार्दा खेरि नेपाली समयअनुसार साँझ ७ः४५ बजेतिर प्रतिऔंस स्पट गोल्ड १ हजार ८९५ डलर शून्य ४७ सेन्टमा किनबेच भइरहेको थियो । यो अघिल्लो दिन बजार बन्द हुँदाको तुलनामा १ दशमलव शून्य ९ प्रतिशत धेरै थियो । कोमेक्समा बिहानी कारोबारदेखि नै सुनको भाउ उकालो लाग्न थालेको थियो ।
बिहीबार यूएस गोल्ड फयूचर्स पनि प्रतिऔंस १ दशमलव २ प्रतिशतको वृद्धिसहित १ हजार ८९३ डलर ६ सेन्ट कायम भएको थियो । पूर्वी यूरोपमा तनाव पुनः बल्झिएपछि सुनको भाउले टेवा पाएको यूबीएसका विश्लेषक जिओभान्नी स्ताउनोभोले भनेका छन् ।
पालाडियमको भाउ पनि उस्तै तरिकाले बढ्न सक्ने भएपनि भाउलाई आपूर्तिसम्बन्धी चिन्ताले डोर्याउन सक्ने उनले बताएका छन् । सुनलाई भने सेफ हेभन हैसियतबाट लाभ भएको उनको भनाइ छ । पालाडियमको भाउ पनि २ दशमलव ३ प्रतिशतले बढेर २ हजार ३३२ डलर ३० सेन्टमा उक्लिएको छ ।
युक्रेनी सेनाहरुले सम्झौताको उल्लंघन गर्दै आफ्नो क्षेत्रमा गोलाबारी गरेको रुस समर्थित विद्रोहीहरुले आरोप लगाएका छन् । रुसले युक्रेनमाथि हमला गर्यो भने नयाँ प्रतिबन्ध लगाइने चेतावनी पश्चिमी देशहरुले दिइरहेका छन् । रुसमा शीर्ष पालाडियम उत्पादक देश मध्ये एक हो ।
रुसले आक्रमण गर्छ कि गर्दैन भन्नेमा बजार निर्भर रहेकोले सुन व्यापाीहरु पछिल्ला घटनाक्रमप्रति चिन्तित रहेको सिटी इन्डेक्समा वरिष्ट बजार विश्लेषक म्याट शिम्पसन भन्छन् ।
रुसले युक्रेनमा हमला गर्यो भने सुनको भाउ झनै बढ्न सक्ने बताइएको छ । सुनको भाउमा तीव्र कमी आउन भने रुसी सेनाहरु सीमा छाडेर गएको देखिनु पर्ने उनको तर्क छ । अमेरिकी केन्द्रीय बैंक फेडरल रिजर्भले यस अघि अपेक्षा गरिएभन्दा कम आक्रामक रुपमा कदम चाल्ने संकेत बुधबारको नीतिगत बैठकको माइन्यूट्सले देखाएको थियो ।
यो खबर सार्वजनिक भएलगत्तै बिहिबार अमेरिकी डलर र ट्रेजरीको प्रतिफल घटेको छ । सुनसँग विपरित सह–सम्बन्ध ठानिएको डलर सस्तो हुँदा पनि सुनको भाउले बिहीवारको कारोबारमा टेवा पाएको हो ।
भूराजनीतिक तनाव नघटेसम्म सुनको भाउ प्रतिऔंस १ हजार ८४५५ डलर देखि १ हजार ८८० डलरबीच रहने गोल्डसिल्भर सेन्ट्रलका प्रवन्ध निर्देशक ब्रायन लानले बताएका छन् ।
बिहीबार अन्य बहुमुल्य धातुको भाउ पनि बढेका छन् । चाँदीको भाउ प्रतिऔंस १ प्रतिशतले बढेर २३ डलर ७८ सेन्टमा पुगेको थियो । प्लाटिनम पनि १ दशमलव ७ प्रतिशतको वृद्धिसहित १ हजार ७९ डलर २८ सेन्टमा उक्लिएको छ । यो पछिल्लो तीन महीनायताकै उच्च हो ।
अन्तर्राष्ट्रिय बजारमा सुनको भाउ उकालो लागेसँगै नेपालमा पनि सुनको मूल्य एक लाख नाघ्ने व्यवसायीको अनुमान छ । यस अघि कोभिड संक्रमण शुरु हुँदा नेपालमा सुनको मूल्य प्रति तोला १ लाख ३ हजार रुपैयाँ हाराहारी पुगेको थियो ।
