काठमाडौं। नेपाल नागरिक उड्डयन प्राधिकरणले पछिल्ला चार वर्षमा आम्दानीको लक्ष्य हासिल गर्न नसकेको पाइएको छ । आर्थिक वर्ष २०७६/७७ यताको चार वर्षमा प्राधिकरणले अनुमानित लक्ष्यभन्दा १६ अर्ब ४९ करोड ७५ लाख रुपैयाँ कम आम्दानी गरेको विवरण सार्वजनिक गरेको छ । प्राधिकरणले कोरोना महामारीका कारण आर्थिक वर्ष २०७६/७७ यता लक्ष्य अनुसार आम्दानी गर्न नसकेको बताएको छ । प्राधिकरणले गत आर्थिक वर्ष २०७९/८० मा १४ अर्ब ३२ करोड रुपैयाँ आम्दानी गर्ने लक्ष्य राखेको थियो । प्राधिकरणको सो वर्षको वास्तविक आम्दानी लक्ष्यभन्दा ९२ करोड ७१ लाख रुपैयाँले कम छ ।
प्राधिकरणले आर्थिक वर्ष २०७६/७७ यताका हरेक वर्ष आम्दानी लक्ष्य बढाउँदै लगेको देखिन्छ । उक्त लक्ष्य हासिल गर्न भने सकेको छैन । प्रत्येक वर्ष १० प्रतिशतका दरले आम्दानी वृद्धि हुने भएकाले सोही अनुपातमा आयको लक्ष्य राखिएको प्राधिकरणको भनाइ छ । तर, कोभिड–१९ को असरबाट लक्ष्य प्रभावित भएको दाबी प्राधिकरणको छ ।
कोभिड–१९ का कारण २०७६ चैत ११ देखि बन्दाबन्दी भई हवाई आवागमन ठप्प रहेको, आन्तरिकदेखि अन्तरराष्ट्रिय विमानस्थल निर्माण समयमै सम्पन्न हुन नसकी ‘टाइम भ्यालू अफ मनी’मा क्षति भएको र अन्तरराष्ट्रिय हवाइ आवागमन कोभिड–१९ अघिको अवस्थामा हालसम्म पनि पुग्न नसक्दा अनुमानित लक्ष्य भेट्न नसकेको प्राधिकरणको भनाइ छ ।
प्राधिकरणले जहाजको ल्यान्डिङ, पार्किङ, ग्राउन्ड ह्यान्डलिङ शुल्कका साथै विमानस्थल र प्राधिकरणको भौतिक संरचना भाडाबाट आम्दानी गर्छ ।
