पूँजीबजारको विकास र विस्तारका लागि सबै पक्षसँग सहकार्य : नेप्से सीईओ

फागुन २१, काठमाडौं । नेपाल स्टक एक्सचेन्ज (नेप्से) का प्रमुख कार्यकारी अधिकृत (सीईओ) कृष्णबहादुर कार्कीले पूँजीबजारको विकास र विस्तारका लागि सबै पक्षसँग सहकार्य गर्ने बताएका छन् । नेपाल आर्थिक पत्रकार संघ (नाफिज) को सहकार्यमा आयोजित पूँजीबजार रिपोर्टिङसम्बन्धी अन्तर्क्रियामा उनले आगामी दिनमा पूँजीबजारसँग सम्बन्धित सबै पक्षसँग छलफल र सहकार्य गर्दै अगाडि बढ्ने प्रतिबद्धता व्यक्त गरे । उनले सम्पूर्ण लगानीकर्ताको हितका लागि नेप्सेको वेबसाइटलाई अझ गतिशिल बनाएर सही सूचना सम्प्रेषणमा नेप्सेले जोड दिने पनि बताए। उनले नेपाली पूँजीबजारको आवश्यकता अनुसार नयाँ स्टक एकचेञ्ज आउनु पर्ने बताए। तर उनले यसअगाडि आफूले तत्काल नयाँ स्टक एकचेञ्ज ल्याउन पहल गर्छु नभनेको पनि बताए । बजारको आवश्यकतालाई नेप्सेले पूरा गर्नुपर्ने भन्दै उनले नेप्से त्यही अनुसार लाग्नु पर्ने कुरामा जोड दिए । नेप्सेलाई पुनसंरचना पनि गर्नुपर्छ भनेर अध्ययन भएको भन्दै उनले नेप्सेको साधारण शेयर(आईपीओ) कति गर्ने भन्ने कुरा छलफल तथा अध्ययन गरेर जाने सहमति भएको र सरकारले स्वीकृत दिएको अवस्थामा मात्रै यसले अन्तिम रुप पाउने पनि बताए । त्यसैगरी सीडीएससीका पूर्णप्रसाद आचार्यले आफूहरुले सेवाग्राहीबाट बढी सेवा शुल्क नलिएको बताए । ‘हामीले सरकारले तोकेको सेवा शुल्क लिने हो, हामी आफैंले सेवा सेवा शुल्क तोक्दैनौं’, उनले भने, ‘केही मिडियाबाट बढी शुल्क लियो भन्ने  खालको भ्रम सृजना भयो । उनले डिम्याट खाता नवीकरण गर्दा सीडीएससीले १० रुपैयाँमात्रै पाउने पनि बताए। उनका अनुसार हाल डिम्याट खाताको संख्या नेपालमाा ५० लाख नाघेको छ। जसमा ५७ प्रतिशत पुरुष र ४३ प्रतिशत महिलाको सहभाागिता रहेको छ। उनले पूँजीबजार विस्तार र विकासका लागि रातदिन काम भइरहेको भन्दै कहिले काहीं सीडीएससीको प्रणालीहरुमा समस्या आउँछन्, तिनलाई पनि निराकरण गर्दै लगेका छौं भने । हाल डाटा सेक्युरिटी, केन्द्रीय केवाईसी, नेप्से र ब्रोकर बीच डाटा एक्सिस, ई–भोटिङ डेभलपमेन्टमा काम भइरहेको उनको भनाइ थियो । कार्यक्रममा चालू आवको माघ मसान्तसम्म नेप्सेले पूँजीबजारबाट ८ अर्ब ९० करोड रुपैयाँ राजस्व संकलन गरेको जानकारी दिइएको थियो ।