दैनिक १ हजार ५ सयको हाराहारीमा पर्यटकलाई स्वागत गर्दै आएको त्रिभुवन अन्तरराष्ट्रिय विमानस्थल (टीआईए) को मर्मतसम्भारको काम अन्तिम चरणमा पुगेको छ । नेपाल पर्यटन वर्ष २०११ को कार्यक्रमअन्तर्गत सो कार्य अघि बढाइएको त्रिभुवन अन्तरराष्ट्रिय विमानस्थल, अध्यागमन विभागका प्रबन्ध निर्देशक दिनेशप्रसाद श्रेष्ठले बताए । उनले भने, ‘अन्तरराष्ट्रिय पार्किङस्थल, नयाँ विद्युतीय सामग्री जडान, राडार मर्मत, सीसीटीभी जडानलगायतका कार्य लगभग सकिन लागेको छ । पर्यटन वर्ष शुरू हुनुअघि नै यो काम सक्नेछौं ।’
श्रेष्ठका अनुसार जहाज चढ्नुअघि यात्रुलाई लगेर राखिने ठाउँ फराकिलो बनाउने काम ९५ प्रतिशत सकिएको छ । यस्तै भ्रमण वर्षलाई ध्यानमा राखेर ५ सय ट्रली थप गरिनुका साथै अन्तरराष्ट्रिय पार्किङ स्थल नौवटा पुर्याइएको छ । ‘दशैंलगत्तै विमानस्थलवरिपरि १ सय ७५ वटा सीसीटीभी थपिँदै छन् । विमानस्थलमा रङरोगन गरिनेछ र पुराना विद्युतीय सामानका ठाउँमा नयाँ जडान गरिनेछ,’ उनले भने । टीआईएका अनुसार आगामी ३ महिनाभित्र उडान सूचना दिने नयाँ प्रविधि र सूचना बोर्ड थपिनुका साथै एयरकण्डिशनको संख्या पनि बढाइनेछ ।
विमानस्थल मर्मतसम्भारका लागि रू. ५ करोड बजेट छुट्ट्याइएको अध्यागमन विभागले बतायो । यसैबीच पर्यटन तथा नागरिक उड्डयन मन्त्रालयले भौतिक पूर्वाधार तथा विमानस्थल मर्मतसम्भारको काम सकिए विमानस्थलमा २४ सै घण्टा सेवा दिन सकिने बताएको छ ।
वर्ष ६, अंक ३६, बिहीवार, २८ असोज २०६७
