काठमाडौं । चालू आर्थिक वर्षको पहिलो त्रैमासमा २७ वाणिज्य बैंकको निष्क्रिय कर्जा औसतमा २७ प्रतिशतले घटेको छ । वाणिज्य बैंकहरूले हालै सार्वजनिक गरेको चालू आवको पहिलो त्रैमासिक वित्तीय विवरणले यस्तो देखाएको हो ।
चालू आवको असोज मसान्तसम्म वाणिज्य बैंकहरूको निष्क्रिय कर्जा १ दशमलव १७ प्रतिशत छ, जुन गत आवको सोही अवधिको तुलनामा शून्य दशमलव ४४ प्रतिशत विन्दुले कम हो । गत आवको सोही अवधिमा वाणिज्य बैंकहरूको निष्क्रिय कर्जा औैसतमा १ दशमलव ६१ प्रतिशत रहेको थियो ।
कोरोना संकटका कारण गत आवमा बैंकहरूको निष्क्रिय कर्जा बढ्न गएको थियो । विशेषगरी कोरोनाले व्यवसायहरू प्रभावित भएपछि ऋणीहरूले कर्जाको किस्ता तिर्न सकेका थिएनन् । फलस्वरूप निष्क्रिय कर्जा पनि बढेको थियो ।
तर, अहिले भने निष्क्रिय कर्जा ≈वात्तै घटेको छ । कोरोना विपद् सामान्य भएर आर्थिक गतिविधि बढ्न थालेपछि खराब कर्जा घटेको बैंकरहरू बताउँछन् ।
नेपाल बैंकर्स संघका पूर्वअध्यक्ष तथा सानिमा बैंकका सीईओ भुवन दाहालले कोरोना विपद् सामान्य भएर आर्थिक गतिविधि बढेपछि खराब कर्जा घटेको बताए । समीक्षा अवधिमा निष्क्रिय कर्जामा अत्यन्त राम्रो सुधार देखिएको उनको भनाइ छ ।
‘कोरोना विपद्का कारण आर्थिक गतिविधि कमजोर हुँदा पहिला ऋणीहरूले कर्जाको किस्ता तिर्न सकेका थिएनन् । तर, अहिले कोरोना विपद् सामान्य हुँदै गएर आर्थिक गतिविधि बढ्न थालेको छ । फलस्वरूप ऋणीहरूले पनि कर्जाको किस्ता तिर्न थालेका छन्, त्यसको असरले निष्क्रिय कर्जा घटेको हो,’ दाहालले भने ।
यस्तै, नेपाल राष्ट्र बैंकले मौद्रिक नीतिमार्फत कोरोना प्रभावित क्षेत्रमा प्रवाहित कर्जालाई पुनर्तालिकीकरण, पुनःसंरचना गर्न भनेको थियो । सोहीअनुसार बैंकहरूले पनि सम्बद्ध कर्जाहरूलाई पुनर्तालिकीकरण तथा पुनःसंरचना गरेका छन् । त्यसकारण पनि बैंकहरूको निष्क्रिय कर्जा घटेको सीईओ दाहालको भनाइ छ ।
वाणिज्य बैंकहरूले निष्क्रिय कर्जाअन्तर्गत ब्याड, सबस्ट्यान्डर्ड र डाउटफुल प्रकृतिका कर्जा समावेश गर्दै आएका छन् । गुड लोन र वाच लिस्टअन्तर्गतको कर्जा भने यसमा समावेश हुने गरेका छैन ।
समग्रमा वाणिज्य बैंकहरूको निष्क्रिय कर्जा घटे पनि ४ बैंकको भने बढेको छ । नबिल, माछापुच्छ्रे, सिटिजन्स बैंक र एनआईसी एशिया बैंकको निष्क्रिय कर्जा बढेको वित्तीय विवरणमा देखिन्छ । माछापुच्छ्रे बैंकको निष्क्रिय कर्जा ०.५ प्रतिशत रहेको छ । गत आवको समीक्षा अवधिमा सिटिजन्सको निष्क्रिय कर्जा १ दशमलव ४३ प्रतिशत थियो । तर, अहिले त्यो बढेर १ दशमलव ९१ प्रतिशत पुगेको छ । यस्तै, गत आवको समीक्षा अवधिमा शून्य दशमलव ४ प्रतिशत रहेको एनआईसी एशियाको निष्क्रिय कर्जा अहिले शून्य दशमलव ४९ प्रतिशत पुगेको छ । यस्तै, गत आवको समीक्षा अवधिमा शून्य दशमलव ६५ प्रतिशत रहेको नबिल बैंकको यस्तो कर्जा अहिले १ दशमलव १३ प्रतिशत पुगेको छ । यसैगरी नेपाल एसबीआईको निष्क्रिय कर्जा शून्य दशमलव १७ प्रतिशतमा नै सीमित रहेको देखिन्छ ।
समीक्षा अवधिमा सानिमा बैंकको सबैभन्दा थोरै निष्क्रिय कर्जा रहेको छ । उक्त बैंकको निष्क्रिय कर्जा शून्य दशमलव ११ प्रतिशत मात्र रहेको छ । दोस्रो नम्बरमा रहेको एभरेष्ट बैंकको निष्क्रिय कर्जा शून्य दशमलव १३ प्रतिशत रहेको छ । यसैगरी नेपाल एसबीआई बैंकको निष्क्रिय कर्जा शून्य दशमलव १७ प्रतिशत रहेको छ । समीक्षा अवधिमा १४ बैंकको खराब कर्जा १ प्रतिशतभन्दा कम रहेको वित्तीय विवरणमा उल्लेख छ ।
राष्ट्रिय वाणिज्य बैंकको भने सबैभन्दा बढी निष्क्रिय कर्जा देखिएको छ । उक्त बैंकको निष्क्रिय कर्जा ३ दशमलव ०१ प्रतिशत रहेको छ ।
