विराटनगर (अस) । कोरोना महामारीका कारण उद्योग, व्यवसायलगायतका क्षेत्रले भोग्नुपरेको व्यावसायिक समस्यालाई दृष्टिगत गरी विभिन्न उद्योग, प्रतिष्ठानका सञ्चालक र उच्च व्यवस्थापकको व्यवस्थापकीय क्षमता अभिवृद्धि गर्ने उद्देश्यले उद्योग संगठन मोरङको आयोजनामा ‘संकटको समय व्यापारको पुनः रणनीतिकरण’ विषयक उत्प्रेरणामूलक कार्यक्रम सम्पन्न भएको छ ।
कार्यक्रम नेपाली युवा उद्यमी मञ्च विराटनगर च्याप्टरको सहकार्यमा आयोजना गरिएको हो । कार्यक्रममा संगठनका अध्यक्ष सुयश प्याकुरेलले विश्वव्यापी महामारीले सिर्जना गरेको आर्थिक संकटले सबै क्षेत्रलाई निराश तुल्याएको समय उद्योगी व्यवसायीले आफनो व्यवस्थापकीय क्षमतालाई अभिवृद्धि गर्दै दीर्घकालीन रणनीति तर्जुमा गर्नुपर्ने धारणा राखे ।
संगठनद्वारा आयोजित फरक धारको कार्यक्रमका माध्यमबाट उद्योगी व्यवसायीलाई उत्प्रेरणा मिल्ने विश्वास उनको छ । कार्यक्रमका संयोजक एवं संगठनका कार्यसमिति सदस्य सौरभ सारडाले आर्थिक विकासका सूत्रधार उद्योगीले हाल सामना गर्नु परिरहेको आन्तरिक र बाह्य चुनौतीलाई दृष्टिगत गरी आयोजित कार्यक्रमले उद्योगीलाई आगामी दिनमा आफनो कार्यदिशा, योजना र रणनीति विकासमा सहयोग पुग्ने बताए । कार्यक्रमको समन्वयकर्ता संस्था फेक्ट नेपालका कार्यकारी निर्देशक मनीष झाले कोरोना महामारीले बहुउद्देश्यीय कम्पनीलाई समेत आफ्ना व्यावसायिक रणनीति पुनः समीक्षा गर्न बाध्य बनाएको उदाहरण प्रस्तुत गरे ।
उद्योगीले अबका दिनमा व्यावसायिक योजनामा मात्र सीमित नभई अन्य विकल्पलाई समेत आत्मसात गर्नुपर्ने धारणा उनले राखे । स्रोत–व्यक्ति साउथ एसिया सोसाईटी अफ एन्टरप्रेनर्स एडुकेटर्सका अध्यक्ष आशुतोष तिवारीले उद्योगीले सकारात्मक सोचका साथ आगामी दिनमा बजारीकरणको माध्यमबाट खर्च न्यूनीकरण गर्दै प्रतिस्पर्धात्मक क्षमता वृद्धि गर्नुपर्ने उपाय सम्बन्धमा प्रस्तुति दिएका थिए ।
नेपाल उद्योग परिसंघ प्रदेश १ का अध्यक्ष भीम घिमिरे, नेपाल युवा उद्यमी मञ्च विराटनगर च्याप्टरका अध्यक्ष युनेशराज श्रेष्ठले उद्योगीलाई लक्षित गरी आयोजना गरिएको कार्यक्रमले सबैलाई आगामी कार्यदिशा तय गर्न ऊर्जा प्राप्त भएको धारणा राखे । कार्यक्रममा यस क्षेत्रका उद्योगी, व्यवसायी, महिला उद्यमी, बैंकर्स, प्राध्यापक र विभिन्न उद्योग प्रतिष्ठानका उच्च व्यवस्थापकको सहभागिता थियो ।