अर्थ मन्त्रालयले आर्थिक वर्ष २०६७/६८ का लागि पर्यटन मन्त्रालयलाई ८१ करोड ३२ लाख रुपैयाँको बजेट छुट्याएको छ । अर्थ मन्त्रालयले यही बजेटसीमा भित्र रहेर कार्यक्रम तयार गर्न पर्यटनलाई आग्रह गरेको छ । दुवै मन्त्रालयबीच भएको छलफलमा अर्थले यो सीमा प्रस्ताव गरेको हो । अर्थ मन्त्रालयले पर्यटन वर्ष २०११ का लागि २३ करोड रुपैयाँ दिने सैद्धान्तिक सहमति गरेको छ । पर्यटन मन्त्रालयका प्रवक्ता लक्ष्मणप्रसाद भट्टराईका अनुसार पर्यटन वर्षका लागि ७ करोड रुपैयाँ सिलिङ बजेटबाट प्राप्त हुन्छ । बाँकी १७ करोड रुपैयाँ प्रस्तावित बजेटभन्दा बाहिरबाट उपलब्ध गराउन मन्त्रालय सहमत भएको हो । ‘अहिले हामी छलफलकै चरणमा छौं,’ भट्टराईले भने ।
प्रस्तावित बजेटमा पर्यटन पूर्वाधार विकासका लागि ५५ करोड रुपैयाँ छुट्याएको छ । बाँकी पर्यटन वर्ष र विकासका लागि खर्च हुनेछ । मन्त्रालयसमक्ष पर्यटन वर्ष २०११ को सचिवालयले पर्यटन वर्षका लागि ३२ करोड रुपैयाँ आवश्यक भएको जानकारी दिएको छ । यो रकम अन्तर्राष्ट्रिय पर्यटन प्रवर्द्धनमा खर्च गर्न माग गरिएको हो । अहिले नेपाल पर्यटन बोर्डले अन्तर्राष्ट्रिय पर्यटक प्रवर्द्धनमा वार्षिक करिब १८ करोड रुपैयाँ खर्च गर्दै आएको छ । यो खर्च बोर्डले आफ्नै आन्तरिक स्रोतबाट गर्दै आएको थियो । तर, पर्यटन वर्षमा व्यापक अन्तर्राष्ट्रिय प्रवर्द्धन गरिने हुँदा आन्तरिक स्रोतमात्र नपुग्ने सचिवालयको भनाइ छ । दश लाख पर्यटक भित्र्याउन अन्तर्राष्ट्रिय सञ्चारमाध्यममा प्रचार प्रसार गर्नुपर्छ । साथै अन्तर्राष्ट्रिय बजार प्रवर्द्धनमा पनि ठूलै लगानी गर्नुपर्छ ।
वर्ष ५, अंक ४२, २०६७, असार ७–१३
