मध्यपहाडी लोकमार्ग  ‘एक महीनामै बग्न थाल्यो अलकत्रा’

मध्यपहाडी लोकमार्गमा अन्तर्गत रुकुम पश्चिमको मुसीकोट खण्डमा कालोपत्र गरेको सडकमा अलकत्रा बग्न थालेको छ । गर्मी बढेसँगै मुसीकोट नगरपालिका–३ खरखरे आसपास क्षेत्रको सडकबाट अलकत्रा बग्न थालेको हो । एक महीना अगाडि कालोपत्र गरेको सडकमा अलकत्रा बग्न थालेको हो ।  मुसीकोट नगरपालिका–३ का वडाध्यक्ष दशरथ केसीले एक महीनाअघि कालोपत्र गरेको सडकबाट अलकत्रा निस्कन थालेको र कालोपत्र समेत उप्किन थालेको बताए । उनले भने, ‘अलकत्रा बगेर कालोपत्र समेत उप्किन थालेको छ, यसले कालोपत्रको गुणस्तरमा समेत शंका उब्जाएको छ ।’ अलकत्रा बग्न थालेपछि सवारीसाधन आवतजावतमा समस्या हुने गरेको वडाध्यक्ष केसीले बताए । यसबाट सवारीसाधन दुर्घटनाको जोखिम बढेको उनको भनाइ छ । वडाध्यक्ष केसीले भने, ‘अलकत्राका कारण सवारीसाधनका टायर सडकमै जाम हुने भएकाले दुर्घटनाको जोखिम बढेको हो ।’  रुकुम पश्चिमका प्रमुख जिल्ला अधिकारी हरिप्रसाद पन्तले अलकत्रा बगेको र कालोपत्र समेत उप्केको भन्ने जनगुनासोको आधारमा सडकको अनुगमन गरिएको बताए । उनले भने, ‘सडकबाट अलकत्रा बगेको र कालोपत्र उप्केको विषयमा जाँचबुझ गर्न सम्बन्धित कार्यालयमा लेखी पठाएका छौं ।’  मध्यपहाडी लोकमार्ग योजना कार्यालय दैलेखका प्रमुख सिनियर डिभिजन इञ्जिनीयर युवराज पोखरेलले चिसो समयमा कालोपत्र गरेकाले अलकत्रा बगेको बताए । उनले भने, ‘अलकत्रा वढी भएको ठाउँमा गर्मीका कारण सडक तातिएर अलकत्रा निस्किएको हो ।’ उनले अलकत्रा बढी परेको ठाउँमा गर्मी मौसममा यस्तो खालको समस्या आउने बताए । निर्माण कम्पनीले अहिलेलाई अलकत्रा निस्किएको तथा बगेको ठाउँमा बालुवा वा मसिनो गिट्टी हालेर समस्या समाधान गरिएको बताएको छ । उक्त निर्माण योजना आयोजना कार्यालयलाई हस्तान्तरण नभएकाले निर्माण कम्पनीले नै मर्मतको काम गर्ने प्रमुख सिनियर डिभिजन इञ्जिनीयर पोखरेलको भनाइ छ । यस क्षेत्रमा सडक निर्माणको जिम्मा पाएको यती बिल्डर्सका अध्यक्ष भीमराज केसीले जाडो समयमा कालोपत्र गर्ने क्रममा केही ठाउँमा अलकत्रा बढी परेकाले यस्तो समस्या आएको बताए । उनले भने, ‘चिसोमा अलकत्रा नजम्ने डरले अलि बढी प्रयोग गरिएको ठाउँबाट सडक तातिएर बग्न थालेको हो ।’ उक्त क्षेत्रको करीब पाँच किलोमिटर सडक गत मङ्सिरमा कालोपत्र गरिएको थियो । केही स्थानमा त्यस्तो समस्या आएको र अहिले बालुवा राखेर समस्या समाधान गरिरहेको केसीले जानकारी दिए । मध्यपहाडी लोकमार्ग निर्माणकै क्रममा रहेकाले पूर्ण रूपमा सडक निर्माण नभएसम्म हस्तान्तरण नहुने उनको  भनाइ छ ।