काठमाडौं । काठमाडौं उपत्यकाका प्रमुख तीन जिल्ला अधिकारी (सीडीओ)को बैठकले यातायात सञ्चालनमा लगाइएको जोर बिजोर प्रणाली हटाउने निर्णय गरेको छ । आइतवार बसेको सीडीओहरूको बैठकले निजी तथा सार्वजनिक सबै किसिमका सवारीसाधन चल्न दिने निर्णय गरेको हो ।
यसअघि २५ सीटभन्दा बढी क्षमताका सार्वजनिक बस र निजी सवारी जोर बिजोर प्रणालीमा सञ्चालन गर्न दिइएको थियो । असार १५ गतेदेखि लागू निषेधाज्ञाको अवधि सोमवार सकिने भएकाले मंगलवारदेखि २५ सिट क्षमताभन्दा कमका माइक्रो, टेम्पोसहितका सार्वजनिक तथा निजी सवारीसाधन सञ्चालन गर्न दिने निर्णय गरिएको हो ।
सीट क्षमताभन्दा बढी यात्रु राख्न नपाइनेगरी स्वास्थ्य मापदण्ड अपनाएर सबै सार्वजनिक यातायात सञ्चालन गर्न दिने निर्णय गरिएको काठमाडौंका सीडीओ कालीप्रसाद पराजुलीले बताए ।
यसैगरी बैठकले एउटा कोठामा २५ जनाभन्दा बढी विद्यार्थी राख्न नपाइनेगरी स्वास्थ्य मापदण्ड अपनाएर सबै किसिमका परीक्षा सञ्चालन गर्न दिने निर्णय गरेको छ । यस्तै भेला, गोष्ठी, सम्मेलन, बैठक, प्रशिक्षण जस्ता क्रियाकलाप पनि २५ जनासम्मको उपस्थितिमा गर्न पाइने भएको छ ।
यसैगरी औषधि तथा स्वास्थ्य सामग्रीका पसल जुनसुकै समयमा निर्बाध खुला गर्न दिने निर्णय गरिएकोमा अन्य सबै पसल साँझ ६ बजेसम्म सञ्चालन गर्न दिइने भएको छ ।
खुकुलो बनाउँदै असार ३१ गतेसम्म थपिएको निषेधाज्ञा अवधिमा विवाह÷व्रतबन्ध लगायत क्रियाकलाप होटल÷पार्टी प्यालेसमा गर्न पाइनेछैन । यस्तै भीडभाड, जुलुस, महोत्सव, भोजभतेर, मनोरञ्जन लगायत क्षेत्रमा निषेधाज्ञा यथावत् राख्ने निर्णय गरिएको छ । संक्रमण बढेमा ३१ गते अगावै पनि निर्णय पुनरवलोकन गर्न सकिने काठमाडौंका सीडीओ पराजुलीले बताए ।
