ग्रामीण भूगोलमा सडक निर्माण भएसँगै झोलुङ्गे पुलहरू प्रयोगविहीन भएका छन् । गाउँगाउँमा सडक निर्माण भएसँगै खहरेखोला तथा नदीहरूमा पक्की पुल निर्माण हुन थालेपछि यस्ता पुलहरू प्रयोगविहीन भएका हुन् ।
जिल्लाका हरेक वडा तहहरूमा सडक निर्माण भएपछि ओखलढुङ्गाका झोलुङ्गे पुल प्रयोगविहीन बन्दैगएका छन् । प्रायः सबै खोला तथा खहरेहरूमा यस्ता पुल निर्माण भएको भए पनि सडक खनिएपछि बाटो सहज र छोटो भएकाले आफूहरूले झोलुङ्गे पुलको बाटो नै प्रगोय गर्न छाडेको लिखु-७ की पार्वती लुइँटेल थापाले बताउनुभयो ।
राज्यले करोडाैँ लगानी गरेर निर्माण गरेका यस्ता पुलहरू सडक सञ्जालले हरेक गाउँलाई छोएपछि मर्मत तथा स्याहारसमेत हुन छाडेका छन् ।
