काठमाडौं । पूर्ण सरकारी स्वामित्वको राष्ट्रिय बीमा संस्थान स्थापनाको ५६औं वर्षमा प्रवेश गरेको छ । बिहीवार संस्थान परिसरमा आयोजित ५६औं वार्षिकोत्सव समारोहलाई सम्बोधन गर्दै राजस्वसचिव डा. रामप्रसाद घिमिरेले प्रतिस्पर्धी क्षमता हासिल गर्दै अघि बढ्न संस्थानलाई सुझाव दिए ।
‘बीमा संस्थानले लामो इतिहास बोकेको छ । अहिलेको अवस्थामा संस्थान एक्लो छैन, प्रतिस्पर्धी बढेका छन्,’ उनले भने । अब संस्थानले पनि आफूलाई अब्बल बनाउँदै अघि बढ्नुपर्छ ।’
बीमा क्षेत्रलाई प्रविधिमैत्री बनाउन आवश्यक रहेको समेत राजस्व सचिव घिमिरेले बताए । अहिले बीमा क्षेत्रमा नयाँ नयाँ जोखिमका प्रकारहरू आएको उनले औंल्याए । ‘यसलाई समयमै बुझ्न र पहिचान गर्न सकेनौं भने हामी अगाडि बढ्न सक्दैनौं,’ उनले भने । बीमा गर्नेको ठूलो संख्या रहेको भन्दै उनले त्यो तथ्यांक व्यवस्थित र सुरक्षित रूपमा राख्ने चुनौती रहेको बताए ।
बीमा प्राधिकरणका निर्देशक सुशीलदेव सुवेदीले संस्थान नेपालको वित्तीय क्षेत्रकै धरोहर भएको भन्दै बीमा बजारमा मानव संसाधन उत्पादनदेखि बजारीकरणमा समेत यसले योगदान पुर्याएको बताए । संकटका बेला सहयोग गर्ने सरकारी संस्था नै भएको उनले बताए । संस्थानको लामो समयदेखिको लेखापरीक्षणको समस्या सुल्झाउन प्राधिकरण तयार रहेको उनको भनाइ थियो ।
संस्थानका अध्यक्ष ईश्वर पौडेलले संस्थानका समस्या र चुनौतीको समाधान गर्दै अघि बढ्ने बताए । सूचना प्रविधिमैत्री जनशक्तिको अभावमा पनि संस्थानले स्थापनाकालदेखि नै विश्वसनीय संस्थाको रूपमा पहिचान बनाउन सफल भएको उनले बताए ।
यसैगरी संस्थानका प्रशासक कविप्रसाद पाठकले संस्थान स्थापनाको ५६औं वर्षमा प्रवेश गरिरहँदा मुलुकमा स्थापित जीवन बीमा कम्पनीहरूसँग प्रतिस्पर्धा गर्दै आफ्नो पहिचान थप मजबूत बनाउँदै लगेको बताए । चालू आर्थिक वर्षको अन्त्यसम्ममा नेपाल बीमा प्राधिकरणबाट स्वीकृति लिई लेखापरीक्षण र बीमांकीय मूल्यांकन सम्पन्न भइसकेको अवधिको साधारणसभा सम्पन्न गरिने जानकारी उनले दिए । साथै बाँकी अवधिका लेखापरीक्षण र बीमांकीय मूल्यांकन कार्य सम्पन्न गर्ने संस्थानको कार्ययोजना रहेको उनले बताए ।
संस्थानको दीर्घकालीन रणनीतिक योजना तर्जुमा गर्ने, नेपाल बीमा प्राधिकरणको निर्देशन बमोजिम पूँजी वृद्घि गर्ने, तोकिएको समयावधिभित्र संस्थानलाई पब्लिक लिमिटेड कम्पनीमा परिणत गर्ने पनि संस्थानको योजना रहेको उनले बताए । राष्ट्रिय बीमा संस्थान पेशागत अभिकर्ता संघका अध्यक्ष शम्भु ढुंगानाले अभिकर्ताले बीमा संकलन गरेर नै बीमा क्षेत्र फस्टाउने भन्दै अभिकर्ता बीमा क्षेत्रका महत्त्वपूर्ण खम्बा भएको बताए । २०२४ साल १ गते स्थापना भई फागुन ११ गतेदेखि संस्थानले व्यावसायिक कारोबार शुरू गरेको थियो ।
यसैबीच, वार्षिकोत्सव समारोहमा संस्थानमा कार्यरत अभिकर्तामध्ये १० उत्कृष्ट बीमा अभिकर्तालाई सम्मान गरिएको छ । संस्थानले सर्वोत्कृष्ट व्यवसाय गर्ने बीमा अभिकर्ता हरिशरण शिवाकोटीका साथै मनकुमार रेग्मी, राजन रिमाल, शान्ति महर्जन, नारायणप्रसाद गिरी, गजेन्द्र ठाकुर, वीरेन्द्रबहादुर शंकर, धर्मराज जोशी, बद्रीप्रसाद उप्रेती र कान्छा थापा क्षेत्रीलाई सम्मान गरेको हो । संस्थानले देशभरमा रहेका शाखा कार्यालयहरूमध्ये उत्कृष्ट काम कारबाही गर्दै आएका चारओटा शाखा कार्यालयलाई समेत सम्मान गरेको छ । सम्मानित हुने शाखाहरूमा काठमाडौं उपत्यकामा लगनखेल शाखाका साथै उपत्यका बाहिरबाट नारायणगढ, पोखरा र बुटवल शाखा छन् । यसैगरी संस्थानले ६ जना उत्कृष्ट कर्मचारीलाई पनि सम्मान गरेको छ ।
