काठमाडौं (अस) । स्ट्याण्डर्ड चार्टर्ड बैंक नेपालले ओपन नलेज नेपालको ‘किशोरी प्रोजेक्ट’लाई ३० लाख ३६ हजार रुपैयाँ (२५ हजार अमेरिकी डलर) सहयोग गरेको छ । किशोरी प्रोजेक्टले किशोरावस्थाका युवतीलाई आधारभूत, वित्तीय, डिजिटल र जीवनोपयोगी शीपहरूबाट प्रोत्साहित, सशक्त एवं सुसज्जित गर्ने लक्ष्य राखेको छ ।
परियोजना सातओटै प्रदेशका १० सामुदायिक कलेजमा १०० भन्दा बढी उच्च शिक्षा अध्ययन गरिरहेका युवतीका लागि लक्षित रहने बैंकले बताएको छ । यसको कार्यान्वयन पक्षको दायित्व सिक्वेल फाउण्डेसनले लिएको छ । यो परियोजना बृहत् आर्थिक समावेशीकरण प्रवर्द्धन गर्दै असमानताको सम्बोधनका लागि बैंकको विश्वव्यापी पहल ‘फ्यूचर्स मेकर्स बाई स्ट्याण्डर्ड चार्टर्ड’सँग मिल्दोजुल्दो रहेको बताइएको छ ।
उक्त सहायता रकम बैंकका कर्पोरेट अफेयर्स, ब्राण्ड एण्ड मार्केटिङ प्रमुख प्रनु सिंहद्वारा ओपन नलेज नेपालका प्रमुख कार्यकारी अधिकृत निकेश बलामीलाई हस्तान्तरण गरिएको थियो । रकम हस्तान्तरण समारोहलाई सम्बोधन गर्दै सिंहले भनिन्, ‘विभिन्न शीप सिकाउने र समाजमा आवश्यक प्रगति एवं परिवर्तन ल्याउन सहयोग गर्ने लक्ष्य लिएको ओकेएनसँग सहकार्य गर्न पाउँदा बैंक हर्षित छ ।’
