सुर्खेत (अस) । यातायात व्यवस्था कार्यालय, सुर्खेतले परीक्षणकालीन सवारीचालक अनुमतिपत्र वितरण शुरू गरेको छ । परीक्षणकालीन सवारीचालक अनुमतिपत्र वितरण शुरू भएसँगै ट्रायल परीक्षा पास गरेका नयाँ सेवाग्राहीले चिट बोकेर हिँड्नुपर्ने बाध्यता हटेको छ भने स्मार्टकार्ड पर्खिनु नपर्ने भएको छ ।
सुर्खेतमा आइतवार एक कार्यक्रमका बीच भौतिक पूर्वाधार तथा शहरी विकास मन्त्री अम्मरबहादुर थापाले परीक्षणकालीन सवारीचालक अनुमतिपत्र वितरणको शुभारम्भ गरेका हुन् । उनले ट्रायल परीक्षा पास गरेकालाई लाइसेन्स नपाएर समस्या खेप्नुपर्ने बाध्यता अन्त्य भएको बताए । यातायात व्यवस्था विभागले २९ वर्षपछि यातायात व्यवस्था ऐन लागू गर्ने निर्णय गरेसँगै सुर्खेतसहित सहित देशका विभिन्न भागमा सो निर्णय लागू भएको छ । ट्रायल परीक्षा पास गरेपछि १ वर्षसम्मको अवधि राखेर परीक्षणकालीन लाइसेन्स दिइने व्यवस्था गरिएको हो । यो अवधिमा पाँच गल्ती गरेमा लाइसेन्स नै खारेज हुने यातायात व्यवस्था कार्यालय सुर्खेतका प्रमुख आन्दन चपाईंले जानकारी दिए । उनले यसअघि पास भएका चालकलाई यातायात कार्यालयले रसिद दिँदै आएकोमा अब क्यूआर कोड जडान गरिएको परीक्षणकालीन कार्ड तत्काल वितरण गरिने बताए ।
ट्रायल परीक्षा पास गरेर राजस्व तिरेको रसिद देखाउँदा पनि ट्राफिक प्रहरीले जरीवाना लगाउने गरेको गुनासो बढ्दो थियो । क्यूआर कोड जडान गरिएको परीक्षणकालीन कार्ड तत्काल वितरण हुने भएपछि सेवाग्राहीले भोग्दै आएको समस्या पनि समाधान हुने भएको छ ।
नयाँ सवारी चालक अनुमतिपत्र बाहकले लिखित तथा ट्रायल परीक्षा पास गरेपछि राजस्व दाखिला गरी रसिद काटेकै दिन परीक्षणकालीन कार्ड उपलब्ध गराइने यातायात व्यवस्था कार्यालयका प्रमुख चपाईंले जानकारी दिए । ‘क्यूआर कोड जडित कार्ड नक्कली हो कि सक्कली हो भन्ने परीक्षण गर्न सकिन्छ,’ चपाईंले भने । लामो समयदेखि नयाँ स्मार्टकार्ड अभाव भइरहेका बेला परीक्षणकालीन कार्ड वितरणले सेवाग्राहीलाई सहज हुने उनले बताए ।
स्मार्ट कार्ड नहुँदा दोष खेपिरहेका यातायात कार्यालयका कर्मचारीलाई समेत उक्त व्यवस्थाले राहत दिएको छ । हालैमात्र चालक अनुमतिपत्रका लागि ट्रायल पास गरेका नयाँ सेवाग्राहीलाई परीक्षणकालीन कार्ड दिने व्यवस्था गरिएको कार्यालयले बताएको छ । इगलआई आईटी सर्भिस र मालिका इन्कर्पाेरेट प्रालिको प्राविधिक सहकार्यमा देशभर परीक्षणकालीन चालक अनुमतिपत्रको व्यवस्थापन मिलाइएको हो ।
