नेपाल कम्युनिष्ट पार्टी (नेकपा) का उपाध्यक्ष तथा राष्ट्रिय सभाका सदस्य वामदेव गौतमले आफ्नो जीवनमा गणतन्त्र नेपालको स्थापना र कम्युनिष्ट पार्टीको एकता नै आफ्नो जीवनको दुई लक्ष्य रहेको बताउनुभएको छ । गणतन्त्र स्थापना र कम्युनिष्ट एकता पनि भएर जीवनको लक्ष्य पूरा भए पनि फेरि समस्या आउँदा आफू चिन्तित बनेको बताउनुभयो ।
राष्ट्रिय सभाको बैठकमा विशेष समयमा बिहीबार दलीय धारणा राख्नुहुँदै नेता गौतमले त्यस्तो बताउनुभयो । राष्ट्रियसभा बैठकमा उहाँले आज बोल्नुभएको पहिलो पटक हो । पार्टी अहिले विभाजन भए पनि त्यसको कुनै औचित्य नरहेको बताउनुभयो । “नेकपा पार्टी विभाजन हुनुपर्ने कुनै औचित्य पुष्टि हुँदैन” उहाँले भन्नुभयो, “गएको आठ नौ महिनादेखि निरन्तर पार्टी एकता जोगाउनका निम्ति प्रयास गर्दैआएको छुँ, अविश्वासको प्रस्तावमा, आरोप प्रत्यारोप पत्रमा मैले हस्ताक्षर गरेको छैन ।”
