काठमाडौं (अस) । ई–कमर्स प्लेटफर्म दराजले नयाँ ब्रान्ड लोगो अनावरण गरेको छ । दराज समूहका संस्थापक र सीईओ बियार्के मिक्केलसनले नयाँ ब्रान्ड सुरुआतले व्यवसाय वृद्धिका लागि थप पहल सुरु भएको बताए ।
‘विगत सात वर्षमा दराजले धेरै विकास गरेको छ । हाम्रो यात्राको अर्को अध्यायमा अघि बढ्दै जाँदा ग्राहकको अनुभवलाई उल्लेखनीय रूपमा वृद्धि गर्न व्यवसायको रूपमा गियर परिवर्तन गर्दै छौं भनेर देखाउन ब्रान्डको विकास गर्ने यो सही समय हो,’ उनले भने ।
नयाँ ब्रान्डको लोगो प्रगति, नवीनता, अन्वेषण र आविष्कारको अंश रहेको उनले बताए । यसले दराज प्लेटफर्ममा खरिदकर्ता र बिक्रेता दुवैलाई थप नजिक ल्याउन सहयोग पुर्याउने उनको भनाइ छ ।
दक्षिण एसियाका पाकिस्तान, बंगलादेश, श्रीलंका, नेपाल र म्यानमारमा ई–कमर्सलाई मानिसको दैनिक जीवनको मुख्य भाग बनाउने दराजको महत्वाकांक्षा नयाँ ब्रान्डले सफल हुने उनको विश्वास छ ।
नयाँ लोगोले एउटा प्याकेजलाई प्रतिनिधित्व गर्दछ, जुन ई–कमर्स प्लेटफर्मले एसएमई बिक्रेतालाई ग्राहकसँग भौतिक रूपमा कसरी जोड्न सकिन्छ भन्ने प्रतीकात्मक स्वरूप रहेको कम्पनीले बताएको छ ।
रिब्रान्डिङका साथै दराज नेपालले आँचल कुँवरलाई नयाँ प्रबन्ध निर्देशक (एमडी) नियुक्त गरेको छ । वर्तमान एमडी लिनो अहलेरिङ यो महिना अन्त्यमा सिंगापुरको दराज मुख्यालयमा क्षेत्रीय भूमिकामा सर्नेबित्तिकै आँचलले पदभार सम्हाल्नेछिन् ।
.jpeg)