काठमाडौं । नेपाल र मलेसियाबीच श्रम समझदारी परिमार्जन हुने भएको छ । नेपाल भ्रमणमा रहेका मलेसियाका गृहमन्त्री दतुक सेरी सैफुद्दिन नासुसन इस्मालीको टोली र प्रधानमन्त्री पुष्पकमल दाहालबीच शुक्रवार भएको भेटवार्तामा यस्तो समझदारी भएको हो । आउँदो अक्टोबरमा यसअघिको समझदारी परिमार्जन हुने बताइएको छ । नेपाल र मलेसियाबीच २०७५ कात्तिकमा श्रम समझदारी भएको थियो । अब हुने परिमार्जनमा मलेसियाले घरेलु कामदारको व्यवस्था र नेपालले शून्य लागतको नीतिलाई जोड दिने भनिएको छ । मलेसियाको रोजगारीमा जाने कामदारसँग शुल्क लिन नहुने यसअघि नै सहमति भए पनि श्रमिकले शुल्क तिर्नुपर्ने बाध्यता छ ।
यसअघिको सम्झौता पूर्णरूपमा कार्यान्वयन नहुँदा कामदार मर्कामा पर्दै आएका छन् । सम्झौता अनुसार रोजगारीका लागि मलेसिया जाने कामदारको हवाई टिकटदेखि, स्वास्थ्य परीक्षणलगायतको सम्पूर्ण खर्च त्यहाँका रोजगारदाताले बेहोर्नुुपर्ने हुन्छ । मलेसियाले नेपाली कामदारलाई उच्च प्राथमिकता दिएको छ । केही समयअघि मलेसिया सरकारले कामदारको न्यूनतम पारिश्रमिक वृद्धि गरेर १ हजार ५०० रिंगिट (करीब ४६ हजार ५०० रुपैयाँ) पुर्याएको छ, जसले गर्दा रोजगारीका लागि मलेसिया जाने नेपालीको संख्या बढेको छ । श्रम समझदारीमा परिवर्तन भएसँगै शून्य लागतको नीतिलाई कडाइ गर्न सकिए शुल्कविनै नेपाली कामदार मलेसियाको रोजगारीमा जान पाउँछन् ।
