जेठ १८, काठमाडौं । साताको तेस्रो कारोबार दिन बुधवार नेप्से परिसूचक ७ दशमलव २१ अंक घटेको छ । नेप्से परिसूचक २ हजार १३० दशमलव ७१ विन्दुमा झरेको हो ।
यस अवधिमा कारोबारमा आएका २२७ ओटा धितोपत्रको ३० लाख २० हजार ६७ कित्ता शेयर २३ हजार १३४ पटकमा रू. १ अर्ब ७ करोड ८४ लाख ४ हजार १८१ दशलमव ९५ बराबरको शेयर खरीदविक्री भएको छ । बजेट भाषण पछि लगातार तेस्रो दिन पनि नेप्से परिसूचक घटेको छ । दिनहुँ परिसूचक घटिरहँदा सूचीकृत कम्पनीहरुको शेयरमूल्य धेरै नै सस्तिएको छ । यस्तो अवस्थामा पनि लगानीकर्ता खरीद गर्ने मुडमा देखिदैनन् ।
यसोत लामो समदेखि घट्दो क्रममा रहेको बजारलाई सकारात्मक दिशामा लैजानको लागि नियामक निकायले केही राम्रो कदम चाल्नुपर्ने देखिन्छ । यसो त अब नयाँ आर्थिक वर्षको मौद्रिक नीति सार्वजनिक हुने दिन पनि नजिकिएको छ । यसबाट पूँजीबजार विकास विस्तारका लागि राम्रो निती आएमा शेयर बजारमा सकारात्मक प्रभाव पर्ने जानकारहरु बताउँछन् ।
लगानीकर्ताले शेयर बजार घट्ने बढ्ने भइरहन्छ भन्ने बुझ्नु आवश्यक छ । आफूले लगानी गर्नु पूर्व कम्पनीका आधारभूत पक्ष र प्राविधिक पक्ष राम्रो सँग केलाएर लगानी गरेमा राम्रो प्रतिफल प्राप्त हुने गर्दछ ।
कारोबारमा आएका २२७ ओटा धितोपत्रमध्ये मैलुङखोला जलविद्युत कम्पनी र बलेफी हाइड्रोपावर कम्पनीको शेयरमूल्यमा सकारात्मक सर्किट लागेको छ । मैलुङ खोला जलविद्युत् कम्पनीको शेयरमूल्य अघिल्लो कारोबार दिनको तुलनामा १० प्रतिशत र बलेफी हाइड्रोपावरको ९ दशमलव ९४ प्रतिशत वृद्धि भएसँगै सकारात्मक सर्किट लागेको हो । बलेफी हाइड्रोपावरको शेयरमूल्य रू. १३९ दशमलव ४० र मैलुङ खोला जलविद्युत कम्पनीको रू. ५२८ कायम भएको छ ।
बुधवार शिखर इन्स्योरेन्स कम्पनीको शेयर मूल्यमा नेगेटिभ सर्किट लागेको छ । कम्पनीको शेयर मूल्य अघिल्लो कारोबार दिनको तुलनामा १० प्रतिशत घटेसँगै नेगेटिभ सर्किट लागेको हो । कम्पनीको शेयरमूल्य प्रतिकित्ता रू. ९२४ दशमलव ३० मा झरेको हो । कम्पनीले आव २०७७/७८ को मुनाफाबाट शेयरधनीलाई लाभांश नदिने निर्णय गरेसँगै विक्रेता हावी हुँदा शेयर मूल्य घटेको हो ।
कम्पनीले आगामी चैत मसान्तसम्म बीमा समितिले तोके बमोजिम चुक्ता पूँजी रू. २ अर्ब ५० करोड पुर्याउन जगेडा कोषमा पर्याप्त रकम भएपनि हाललाई गत आर्थिक वर्षको नाफाबाट लाभांश वितरण नगर्ने निर्णय भएको नेप्से मार्फत जानकारी दिएको हो । त्यसैगरी शेयरमूल्य घट्ने दोस्रोमा नेपाल इन्भेष्टमेण्ट बैंकको शेयरमूल्य ७ दशमलव २५ प्रतिशत घटेर रू. ३०७ मा झरेको छ । कम्पनीको शेयरमूल्य घटेसँगै यस कम्पनीको सर्वाधिक शेयर किनबेच भएको छ । कम्पनीको रू. १२ करोड १३ लाख बराबरको शेयर किनबेच भएको हो ।
त्यसैगरी सर्वाधिक शेयर खरीदविक्री हुने दोस्रोमा हिमालयन डिष्टीलरीको रू. ४ करोड ६८ लाख बराबरको भएको हो ।
कारोबारमा आएका १३ समूहगत परिसूचकमध्ये विकास बैंक समूहको परिसूचक शून्य दशमलव ५८ प्रतिशत, वित्त समूहको शून्य दशलमव ३८ प्रतिशत र हाइड्रोपावर समूहको शून्य दशलमव ६८ प्रतिशत वृद्धि भएको हो भने बाँकी सबै समूहको समूहगत परिसूचक घटेको छ ।
समूहगत परिसूचक घट्नेमा व्यापार समूहको १ दशमलव ८३ प्रतिशत, अन्य समूहको शून्य दशमलव २२ प्रतिशत, निर्जीवन बीमा समूहको १ दशमलव ७५ प्रतिशत, म्युचुअल फण्ड समूहको शून्य दशलमव ३६ प्रतिशत, लघुवित्त समूहको शून्य दशलमव ३० प्रतिशत, उत्पादन तथा प्रशोधन समूहको शून्य दशलमव ६४ प्रतिशत, जीवन बीमा समूहको १ दशमलव ५० प्रतिशत, लगानी समूहको शून्य दशमलव १९ प्रतिशत, होटल एण्ड टुरिजम समूहको शून्य दशलमव ३४ प्रतिशत र बैंकिङ्ग समूहको परिसूचक शून्य दशलमव ३४ प्रतिशतका दरले घटेको हो ।
