कोभिड १९ का कारण विश्व अर्थतन्त्र र सामाजिक जनजीवन अस्तव्यस्त बनेको छ । सङ्क्रमित र मृत्युको सङ्ख्या दिनानुदिन बढिरहेको छ । आजको विश्वले विज्ञान र प्रविधिको विकासमा यति ठूलो चमत्कार गरिसक्दा पनि औषधि विज्ञानले कोभिड १९ को निदानसम्बन्धी उपचार पत्ता लगाउन सकेको छैन । अहिलेको अवस्थामा राज्यले आफ्ना नागरिकलाई भौतिक दूरी कायम राख्ने र बन्दाबन्दीको नियम पालना गर्ने भन्ने बाहेक अर्को वैज्ञानिक र भरपर्दो विकल्प प्रस्तुत गर्न सकेको छैन । समृद्ध अर्थतन्त्र भएका मुलुक पनि भगवान् भरोसा गर्नु बाहेक निदानको निश्चित समयावधि र ठोस उपायको विकास गर्न सफल भइरहेको देखिन्न ।