वैशाख ३१, काठमाडौं । नेपाल राष्ट्र बैंकले कोभिड –१९ को महामारीमा सहजीकरण गर्दै यसबीच ड्राफ्ट तथा टीटीबाट बिना सिफारिस स्वास्थ्यसँग सम्बन्धित सामग्री आयात गर्न पाइने व्यवस्था गरेको छ ।
यस्ता सामग्री आयातमा तत्काललाई सटही सुविधा सीमा पनि बढाइएको छ । यद्यपि सामान्यअवस्थामा पनि यस्ता सामग्रीको आयात गर्ने सीमा बढाइएको छ । केन्द्रीय बैंकले विदेशी विनिमय विभागको एकीकृत परिपत्रलाई विहीवार संशोधन गर्दै यस्तो व्यवस्था गरेको हो ।
राष्ट्र बैंककाअनुसार अहिलेको परिस्थितिमा सम्बन्धित सरोकारवालाहरुले अक्सिजन सिलिण्डर, अक्सिजन कन्सन्ट्रेटर्स, अक्सिजन ट्यांक, अक्सिजन जेनेरेटर्स, अक्सिजन म्यानुफ्याक्चरिङ प्लान्ट, अक्सिजन डेलिभरी यासेसरीज र अन्य अक्सिजनसम्बन्धी सामग्री तथा भेन्टिलेटर उपकरणलगायतका कोभिड–१९ को स्वास्थ्य समस्याको उपचारमा सघाउ पुर्याउने जीवनरक्षक स्वास्थ्य सामग्री उपकरणहरुको आयातको हकमा तोकिएका ड्राफ्ट तथा टीटीको रकमसम्बन्धी सीमा, बीसीआई र स्वास्थ्य सेवा विभागको सिफारिस २०७८ असार मसान्तसम्मका लागि अनिवार्य नहुने व्यवस्था गरिएको छ ।
तर यस व्यवस्था बमोजिम आयात गर्दा आयातकर्ताले विदेशी विनिमय अपचलन गरेमा स्वयम् जिम्मेवार हुने स्वघोषणा बैंक तथा वित्तीय संस्थासमक्ष पेश गर्नु पर्ने राष्ट्र बैंकले बताएको छ ।
साथै बैंक तथा वित्तीय संस्थाले उक्त व्यवस्था बमोजिम आयात भएको विवरण संलग्न ढाँचामा मासिक रुपमा प्रत्येक महीना समाप्त भएको सात कार्य दिनभित्र केन्द्रीय बैंकको विदेशी विनिमय विभागमा पेश गर्नुपर्ने छ ।
नेपाल राष्ट्र बैंकले प्रतितपत्र बिना ड्राफ्ट तथा टीटीको माध्यमबाट हुने वस्तु आयातका लागि सटही सुविधाको सीमा बढाइदिएको छ । केन्द्रीय बैंकले कोभिड –१९को जोखिममा स्वास्थ्यसँग सम्बन्धित बस्तु आयातमा सहजिकरण गर्दै ड्राफ्ट तथा टीटीबाट प्रतिपटक अधिकतम अमेरिकी डलर ३५ हजार वा सो बराबरको परिवत्र्य विदेशी मुद्रासम्म सीमा तोकेको हो । यसअघि यस्तो सीमा एक पटकमा अमेरिकी डलर ३० हजार वा सो बरावरको परिवत्र्य विदेशी मुद्रासम्मको लागि मात्र प्रदान गर्न सकिने व्यवस्था थियो ।
सो व्यवस्थाअनुसार यसरी टीटीमार्फत सटही प्रदान गर्दा अमेरिकी डलर २५ हजारभन्दा बढी विदेशी मुद्राको सटही उपलब्ध गराउनु परेमा भने बेनिफीसरीको बिजनेश क्रेडिविलिटि इन्फरमेशन (बीसीआई) समेत लिने व्यवस्था मिलाउनु पर्नेछ । साथै सम्बन्धित फाइलमा सोको अभिलेख राख्नुपर्नेछ ।
कोभिड –१९ को वर्तमान स्वास्थ्य समस्यालाई रोकथाम तथा न्यूनीकरणको लागि सहजीकरण गर्न यो व्यवस्था गरेको राष्ट्र बैंकले बताएको छ ।
यसैगरी, सम्बनिधत व्यवसायीहरुले स्वास्थ्य मन्त्रालय स्वास्थ्य सेवा विभागको सिफारिसमा गरिने कोभिड –१९ सँग सम्बन्धित औषधिजन्य सामग्रीहरु तथा स्वास्थ्य उपकरणहरुको आयातको हकमा एउटै बीजकबाट अमेरिकी डलर १ लाखसम्मको रकम ड्राफ्ट तथा टीटीको माध्यमबाट भुक्तानी गर्न सकिने छ ।
साथै, अमेरिकी डलर १ लाखभन्दा माथिको सटही सुविधा आवश्यक परेमा स्वास्थ्य सेवा विभागको सिफारिससहित स्वीकृतिका लागि राष्ट्र बैंकमा निवेदन दिनुपर्ने छ ।
