स्रोतसाधन, व्यावसायिक वातावरण तथा कच्चापदार्थको अभावलगायत कारण दाङमा पछिल्लो १६ महीनामा ३० वटा उत्पादन तथा सेवा उद्योग बन्द भएका छन् । तीमध्ये अघिल्लो वर्ष २४ सम्म वटा उद्योग बन्द भएका हुन् । साना उद्योग कार्यालय दाङले सबै उद्योग सञ्चालकहरूको स्वेच्छामा बन्द भएको बताएको छ । दर्ता भएका अन्य केही उद्योग निष्क्रिय भए पनि बन्द नभएको बताइएको छ । तिनीहरूको दर्ता खारेज नभएकाले यसबारे थप तथ्यांक पाउन गाह्रो भएको सो कार्यालयका शाखा अधिकृत उमबहादुर ओलीले बताए । ‘यो वर्ष थप अन्य उद्योग पनि बन्द भएका छन्, तर दर्ता नवीकरण गर्ने समय २०६८ सालसम्म भएकाले आधिकारिक तथ्यांक पाउन सकिएको छैन,’ ओलीले भने, ‘केही व्यक्तिले विदेशिनका लागि सरकारबाट ऋण लिने क्रममा आयस्रोत देखाउन सजिलो होस् भनेर पनि उद्योग दर्ता गराएको पाइएको छ । चालू आवको पहिलो ४ महीनामा बन्द भएका उद्यगहरूमा लक्ष्मी पोल्टी फार्म तुलसीपुर, सपना स्वीचबोर्ड उद्योग सिसहानिया, ऐरावती फर्निचर उद्योग चैलाही, राजीव होटेल एण्ड रेष्टुुराँ लालमटिया, भरतपुर होटेल एण्ड रेष्टुराँ घोराही आदि रहेका छन् ।
वर्ष ६, अंक ७९, बिहीवार, २२ मङ्सिर, २०६७
