काठमाडौं । साताको दोस्रो कारोबार दिन सोमवार नेप्से परिसूचक १७ दशमलव ७० अंक बढेर १ हजार ९०६ विन्दुमा पुगेको छ ।
यस दिन नेप्से सेन्सेटिभ इन्डेक्स २ दशमलव ०४ अंक बढेको छ । त्यस्तै फ्लोटेड इन्डेक्स १ दशमलव २८ प्रतिशत र सेन्सेटिभ फ्लोटेड इन्डेक्स शून्य दशमलव ७८ अंक बढेको हो । नेप्से परिसचूचक लगातार तीन दिन घटेपछि सोमवार बढेको हो ।
सोमवारको बजार ट्रेण्डलाई हेर्दा बजारमा घटेर १ हजार ८६४ दशमलव ९१ विन्दुमा आएपछि खरीदकर्ता हाबी भएको देखिन्छ ।
कारोबारमा आएका २६१ धितोपत्रको ४३ लाख ८ हजार ६४५ कित्ता शेयर ३६ हजार ९८० पटकमा रू. १ अर्ब ३८ करोड बराबरको शेयर खरीद विक्री भएको छ ।
कारोबारमा आएका धितोपत्रमध्ये सबैभन्दा बढी सुपर माई हाइड्रोपावरको शेयर मूल्य १० प्रतिशत वृद्धि भएको छ । शेयर मूल्य रू. ४३० दशमलव १० पुगेको हो । त्यस्तै दोस्रोमा एशियन हाइड्रोपावरको शेयर मूल्य ९ दशमलव ९९ प्रतिशत वृद्धि भएर रू. ३९७ दशमलव ५० पुगेको छ ।
त्यस्तै सोमवार नेशनल माइक्रोफाइनान्स लघुवित्त वित्तीय संस्थाको शेयर मूल्यमा नेगेटिभ सर्किट लागेको छ । शेयर मूल्य रू. १ हजार ३८१ दशमलव ५० मा झरेको हो । यस कम्पनीले प्रस्ताव गरेको लाभांश शंसोधन भएपछि विक्री चाप परेको हो ।
कम्पनीको लाभांश दोस्रो पटक संशोधन भएको छ । नेपाल राष्ट्र बैंकले कम्पनीले गत आवको मुनाफाबाट प्रस्ताव गरेको लाभांश दोस्रो पटक संशोधन गरेको हो ।
कम्पनीले पहिलो पटक प्रस्ताव गरिएको ३८ दशमलव ४५ प्रतिशत बोनस शेयर नेपाल राष्ट्र बैंकले संशोधन गरी शेयरधनीलाई हाल कायम चुक्ता पुँजी ५८ करोड ६६ लाख ७४ हजार ९७३ रुपैयाँको ३४ दशमलव ४५ प्रतिशत लाभांश दिने निर्णय गरेको थियो ।
त्यस्तै दोस्रोमा जाल्पा सामुदायिक लघुवित्तको शेयर मूल्य ८ दशमलव ३० प्रतिशत घटेर रू. १ हजार ८८५ कायम भएको छ ।
सर्वाधिक शेयर खरीदविक्री हिमालयन डिष्टिलरीको रू.५ करोड ९० लाख बराबरको भएको छ । यस कम्पनीको शेयर मूल्य रू. १ हजार ९ सय कायम भएको छ । त्यस्तै दोस्रोमा जीवन विकास लघुवित्तको रू. ४ करोड ७० लाख बराबरको शेयर किनबेच भएको छ ।
कारोबारमा आएका १३ समूहगत परिसूचकमध्ये लघुवित्त समूहको परिसूचक शुून्य दशमलव ५१ प्रतिशत घटेको छ भने बाँकी सबै समूहको समूहगत परिसूचक बढेको हो । समूहगत परिसूचक बढ्नेमा सबैभन्दा बढी उत्पादन तथा प्रशोधन समूहको परिसूचक २ दशमलव ३५ प्रतिशत वृद्धि भएको छ ।
केही दिन देखि घट्दो ट्रेण्डमा रहेको बजारमा कम्पनीहरुको शेयर मूल्य निकै सस्तिएकाले सोमवार बजारमा खरीदकर्ता आएको लगानीकर्ताले बताएका छन् । तर यस वृद्धिले कत्तिको निरन्तरता पाउँछ भन्ने भोलिको बजारले निर्धारण गर्ने उनीहरूको भनाइ छ ।
पछिल्लो समय बैंक तथा वित्तीय संस्थामा तरलता पनि सहज हुन थालेको छ भने ब्याजदर पनि घट्दो क्रममा रहेको छ । प्राविधिक विश्लेषकहरुले पनि नप्से परिसूचक टेवा क्षेत्रमा आएर फर्किएको दाबी गरेका छन् । नेप्सेको हालको टेवा १८५० देखि १८८० विन्दुसम्म रहेको विश्लेषकहरूको भनाइ छ । सोमवार बजार यसै आसपासबाट फर्किएको प्राविधिक विश्लेषकले बताएका छन् ।
