साउन २९, काठमाडौं । राधी विद्युत् कम्पनीले गत आवको चौथो त्रैमासिक वित्तीय विवरण शुक्रवार सार्वजनिक गरेको छ ।
उक्त वित्तीय विवरण अनुसार कम्पनीको नाफा अघिल्लो आवको चौथो त्रैमासको तुलनामा गत आवको सोही अवधिमा १७ प्रतिशतले कमी आएको छ । अघिल्लो आवमा कम्पनीले रू. ७ करोड ४० लाख ४३ हजार खुद नाफा आर्जन गरेकोमा गत आवमा रू. ६ करोड १४ लाख ५३ हजारमा सीमित भएको हो ।
गत आवमा कम्पनीको विद्युत् विक्री आम्दानीमा कमी आएसँगै नाफा घट्न पुगेको हो । विद्युत् विक्री आम्दानी अघिल्लो आवको तुलनामा गत आवमा १८ प्रतिशतले कमी आएको छ । कम्पनीले अघिल्लो आवमा रू. १५ करोड ९८ लाख ३५ हजार विद्युत् विक्री बापत आम्दानी गरेकोमा गत आवमा घटेर रू. १२ करोड ९७ लाख २७ हजारमा सीमित भएको हो ।
नाफा घटेसँगै प्रतिशेयर आम्दानीमा पनि कमी आएको छ । अघिल्लो आवमा कम्पनीको प्रतिशेयर आम्दानी रू. १५ दशमलव ६४ रहेकोमा गत आवमा रू. ९ दशमलव ५१ मा सीमित भएको हो ।
कम्पनीले ३६ दशमलव ५ प्रतिशत बोनस शेयरपछि चुक्तापूँजी रू. ६४ करोड ६४ लाख ४ हजार पुगेको छ । यहि पूँजीको आधारमा १४७ दशमलव ५२ प्रतिशत हकप्रद शेयर पनि निष्कासन गर्ने तयारी कम्पनीको रहेको छ ।
हकप्रद शेयर निष्कासन गर्ने प्रस्ताव साधारण सभाबाट पारित गरिसकेको छ भने आवश्यक प्रक्रिया पूरा गरेर नियामक निकाय नेपाल धितोपत्र बोर्डमा निवेदन दिई स्वीकृति पाएपछि मात्र उक्त हकप्रद शेयर निष्कासन गर्नेछ ।
स्रोत : कम्पनीद्वारा प्रकाशित चौथो त्रैमासिक वित्तीय विवरण
