काठमाडौं । नाडा अटोमोबाइल्स एशोसियशन अफ नेपाल (नाडा)द्वारा आयोजित १५औं संस्करणको ‘नाडा अटो शो २०२३’ मंगलवारबाट शुरू भएको छ । शोको उद्घाटन अर्थमन्त्री डा. प्रकाशशरण महतले गरेका छन् ।
अर्थमन्त्री डा. महतले अर्थतन्त्रको विभिन्न क्षेत्रहरूमा क्रमिकरूपमा सुधार आएसँगै गाडीको व्यापारमा पनि सुधार हुने बताए । ‘आर्थिक गतिविधि विस्तारै बढ्दै जाने ठोस आधारहरू देखिन थालेको छ । विदेशी विनिमय सञ्चितिका साथै विदेशी पर्यटक पनि बढेका छन्,’ उनले भने, ‘अटो क्षेत्रका समस्या पनि समाधान हुँदै गएका छन् । त्यसैले अब गाडीको व्यापार पनि बढ्छ ।‘
उनले नाडा अब डिलर एशोसियशनभन्दा पनि उत्पादन एशोसियशन बन्नु पर्ने बताए । ‘एसेम्ब्लिङ शुरू गर्नेलाई सरकारले सहुलियत दिन्छ । नेपालमा मोटरसाइकलको एसेम्ब्लिङ शुरू भएकाले गाडीको पनि एसेम्ब्लिङ शुरू गर्नु पर्छ,’ उनले भने ।
नाडाका अध्यक्ष ध्रुव थापाले चाडवाडलाई मध्यनजर गर्दै आयोजना हुँदै आएको शोमा वर्षभर हुनेमध्ये ६० प्रतिशत व्यापार हुने भएकाले ६ दिनको शोमा करीब २० अर्ब रुपैयाँ बराबरको कारोबार हुने अनुमान रहेको बताए । अटो क्षेत्र विभिन्न नीतिहरुका कारण प्रभावित हुँदै आएकाले अटो क्षेत्रमैत्री नीतिहरूको समेत खाँचो रहेको छ, उनले भने ।
काठमाडौंमा ६ दिनसम्म आयोजना हुने प्रर्दशनीमा सवारी साधन, पार्टपूर्जा, वित्तीय सेवा एवं अन्य सम्बन्धित सरोकारवाला संघसंस्थाको भव्य प्रदर्शनी छ । आयोजकका अनुसार प्रदर्शनीमा ठूला तथा साना गरी करीब १२० ओटा स्टल र ब्लकहरू छन् ।
प्रदर्शनीमा प्रख्यात अन्तरराष्ट्रिय ब्राण्डका सवारी साधन, लुब्रिकेन्ट, टायर, पार्टपूर्जाका साथै राष्ट्रिय ब्राण्डका अटो सामग्री उत्पादक एवं वस्तु तथा सेवा प्रदायकहरूको सहभागिता समेत रहेको छ ।
प्रदर्शनीमा १६ ओटा ब्राण्डका चार पांग्रे, २२ ओटा ब्राण्डका दुई पांग्रे, ७ ओटा ब्राण्डका लाइट कमर्शियल मेडिकल, ९ ओटा वित्तीय संस्था तथा ३० ओटा लुब्रिकेन्ट, टायर, व्याटरी, पार्टपूर्जा एवं ग्यारेज उपकरण कम्पनीहरूको सहभागिता छ । प्रदर्शनीलाई बढी जानकारीमूलक, सेवामूलक र ग्राहकमुखी बनाउन मिडियाको लागि छुट्टै स्टल र ट्राफिक नियम तथा सडक सुरक्षासम्बन्धी सूचना-कक्ष समेत प्रदर्शनीमा राखिएको छ ।
‘नाडा अटो सो २०२३’ लाई टाटा मोटर्स जेनुइन आयलले प्रायोजित गरेको छ । शोको सहप्रायोजकमा शिखर इन्सुरेन्स कम्पनी लिमिटेड छ । प्रदर्शनीको डोर प्राइजमा याडिया, टिकटिङ्ग पार्टनरमा खल्ती, अफिसियल इन्टरनेट पार्टनरमा बलिङ, फायर सेफ्टी सपोर्टमा हिटकी प्रा.लि.एवं हस्पिटल पार्टनरमा फ्रन्टलाइन हस्पिटल जस्ता प्रतिष्ठत संस्थाहरू छन् । प्रदर्शनीको व्यवस्थापन ग्लोबल एक्सपोजिसन एण्ड म्यानेजमेन्ट सर्भिसेजले गरिरहेको छ ।
1695023073.jpg)
