काठमाडौं । गत साता धितोपत्र दोस्रो बजार अघिल्लो साताको तुलनामा ३० दशमलव शून्य ७ अंक तल झरेको छ । अघिल्लो साताको अन्तिम कारोबार दिन १ हजार ९३४ दशमलव ४७ विन्दुमा रहेको नेप्से परिसूचक गत साताको अन्तिम कारोबार दिन १ हजार ९०४ दशमलव ४० विन्दुमा झरेको हो ।
नेप्से (NEPSE) परिसूचक गत साताको पाँच कारोबार दिनमा एक कारोबार दिनमात्र बढेको छ । पहिलो कारोबार दिन २ दशमलव ७९ अंक, दोस्रो कारोबार दिन २३ दशमलव ६३ अंक र तेस्रो कारोबार दिन ३ दशमलव शून्य ७ अंकले नेप्से परिसूचक घटेको हो । चौथो कारोबार दिन १५ दशमलव १४ अंकले उकालो लागेको नेप्से अन्तिम कारोबार दिन १५ दशमलव ७३ अंकले घटेको छ ।
यतिवेला लगानीकर्ता उत्साहित हुने खालको माहोल नहुँदा बजार प्रभावित बनिरहेको ब्रोकरहरू (Stok Broker) बताउँछन् । तेस्रो त्रैमाससम्मको वित्तीय विवरण वाणिज्य बैंकहरूले (Commercial Bank) सार्वजनिक गरिसक्दा धेरैजसो बैंकको निष्क्रिय कर्जा (Non Performing Loan) बढेकै देखिन्छ । बैंकहरूको नाफा बढेसँग सँगै निष्क्रिय कर्जा पनि बढेकाले भविश्यमा आइपर्न सक्ने जोखिमलाई आम लगानीकर्ताहरूले यतिबेला औल्याएका छन् । धितोपत्र दोस्रो बजारमा सर्वाधिक हिस्सा बैंक तथा वित्तीय संस्थाको रहेको अवस्थामा यस क्षेत्रका कम्पनीहरूको वित्तीय अवस्थाले पनि लगानीलाई प्रभाव पारेको छ ।
गत साता नेप्से परिसूचकसँगै ठूला कम्पनीहरूको मात्र कारोबार मापक सेन्सेटिभ इन्डेक्स ४ दशमलव ८६ अंकले घटेको छ । अघिल्लो साताको अन्तिम कारोबार दिन ३६७ दशमलव ९८ विन्दुमा रहेको सेन्सेटिभ इन्डेक्स गत साता ३६३ दशमलव १२ विन्दुमा झरेको हो ।
साताको पाँच कारोबार दिनमा गत साता रू. ३ अर्ब ६४ करोड ९० लाखभन्दा बढीको धितोपत्र कारोबार भएको छ । अघिल्लो साता रू. ४ अर्ब ६२ करोडभन्दा बढीको धितोपत्र कारोबार भएको थियो । अघिल्लो साताभन्दा गत साता कारोबार रकम रू. २ अर्ब २ करोडभन्दा बढीले घटेको हो । कारोबार कित्ता भने अघिल्लो साता २ करोड ११ लाख ४१ हजार भन्दा बढी भएकोमा गत साता १ करोड ४९ लाख ६५ हजार कित्ता मात्र भएको हो ।
अघिल्लो साताभन्दा गत साता औषतमा रू. ४० करोड ५० लाख बराबरको १२ लाख ३५ हजार कित्ता कम धितोपत्र कारोबार भएको हो । गत साता लगानीकर्ताले रू. ३८ अर्ब ७६ करोड ४६ लाखभन्दा बढीको सम्पत्ति मूल्य गुमाएका छन् । अघिल्लो साताको अन्तिम कारोबार दिन रू. २८ खर्ब १३ अर्ब ५५ करोडभन्दा बढी रहेको कुल बजार पूँजीकरण गत साताको अन्तिम कारोबार दिन रू. २७ खर्ब ७४ अर्ब ७८ करोडमा सिमित भएको हो ।
दुई समूहका लगानीकर्ताले मात्रै कमाए
गत साता समग्र धितोपत्र बजार मापक नेप्से परिसूचक घटेपनि दुई समूहगत परिसूचक भने बढेका छन् । गत साता होटल तथा पर्यटन समूहको परिसूचक ६ दशमलव शून्य ६ प्रतिशतले र निर्जीवन बीमा समूहको परिसूचक शून्य दशमलव शून्य २ प्रतिशतले बढेको छ ।
गत साता उत्पादन तथा प्रशोधन समूहको परिसूचक भने सर्वाधिक ३ दशमलव ६१ प्रतिशत घटेको छ । त्यस्तै वित्तको ३ दशमलव १० प्रतिशत, लघुवित्तको ३ दशमलव शून्य ९ प्रतिशत, विकास बैंकको ३ दशमलव शून्य ९ प्रतिशत, लगानीको २ दशमलव ६६ प्रतिशत, जलविद्युतको २ दशमलव ३७ प्रतिशत, व्यापारिकको २ दशमलव शून्य ९ प्रतिशत, म्युचुअल फण्ड र अन्यको १ दशमलव ८२ प्रतिशत, जीवन बीमाको १ दशमलव ७३ प्रतिशत र बैंकिङको शून्य दशमलव ७१ प्रतिशत परिसूचक घटेको छ ।
#NEPSE #Banking #Nonperformingloan #Sharemarket #Investment #abhiyandaily #aarthikabhiyan
