भदौ १७, कास्की । मित्रराष्ट्र चीनका विभिन्न शहरहरुले पोखरा महानगरपालिकालाई स्वास्थ्य सामग्री सहयोग गरेका छन् । पोखरासँग भगिनी सम्बन्ध भएका कुनमिङ, क्वाङचाओे, लिन्जी र गार्जे सहरले पोखरालाई स्वास्थ्य सामग्री सहयोग गरेका हुन् ।
बिहीवार आयोजित एक कार्यक्रमबीच चीनबाट स्वास्थ्य सामग्री ल्याउन समन्वय गरेका नेपाल चीन जनमैत्री संघका अध्यक्ष विश्वशंकर पालिखेले महानगरका उपप्रमुख मञ्जुदेवी गुरुङलाई ति सामग्री हस्तान्तरण गरेका छन् ।
अध्यक्ष पालिखेले मित्रराष्ट्र चीनका विभिन्न शहरबाट पोखरा महानरलाई करीब २ करोड बराबरका सामग्री प्रदान गरेको बताए । अध्यक्ष पालिखेका अनुसार कोरोना रोकथाम र नियन्त्रणका लागि २ ओटा भेण्टिलेटर, १५ ओटा अक्सिजन कन्सन्टेटर मेसिन, ५० ओटा अक्सिजन सिलिण्डर, ३०० ओटा अक्सिमिटर, ८ हजार आरटी पीसीआर किट, ५०० ओटा पीपीई र मास्क हस्तान्तरण गरिएको हो ।
अध्यक्ष पालिखेले दाताहरुले दिएको सामग्री लिन आफूहरु रसुवागढी सिमानासम्म पुगेको जानकारी दिँदै प्रदान गरिएका स्वास्थ्य सामग्रीहरुको सहि सदुपयोग हुने विश्वास व्यक्त गरे ।
सामाग्री ग्रहणपछि बोल्दै पोखरा महानगरकी उपप्रमुख मञ्जुदेवी गुरुङले दाताहरुबाट प्राप्त भएका स्वास्थ्य सामाग्रीको सदुपयोग हुने प्रतिवद्धता जनाइन् । उनले महानगरको स्वास्थ्य महाशाखामार्फत सेवाग्राहीहरुको सेवामा ती सामग्री प्रयोग गरिने बताइन् ।
पोखरा महानगरका स्वास्थ्य महाशाखा प्रमुख हेमन्त पौडेलले दैनिक प्रयोगमा आइरहने उपकरणहरु मध्ये भेण्टिलेटरको आवश्यकता बढ्दै गएको बताउँदै दाताबाट उपलब्ध गराएको भेण्टिलेटरले थप सहयोग पुग्ने विश्वास व्याक्त गरे ।
