काठमाडौं । त्रिभुवन अन्तरराष्ट्रिय विमानस्थललाई आधार बनाउँदै झन्डै साढे २ दशकदेखि आन्तरिक उडान गर्दै आएको निजीक्षेत्रको वायुसेवा कम्पनी बुद्ध एयरले पोखराबाट राष्ट्रिय तथा अन्तरराष्ट्रिय उडान गर्ने भएको छ ।
हाल निर्माणाधीन अवस्थामा रहेको पोखरा क्षेत्रीय अन्तरराष्ट्रिय विमानस्थल सञ्चालनमा आएपछि पाँचओटा जहाज राखेर आन्तरिक र बा⋲य उडान गर्ने बुद्ध एयरले जानकारी दिएको हो ।
पोखरा अन्तरराष्ट्रिय विमानस्थलको धावनमार्गलाई पूर्वतिरबाट जोड्न आग्रह गर्दै कम्पनीले यस्तो जानकारी दिएको हो । एकातर्फबाट मात्र उडान र जहाजको ‘ट्याक्सी–वे’ एउटै हुँदा एयर ट्राफिक स्वाभाविक बढ्ने भन्दै सुधारका लागि कम्पनीले आग्रह गरेको छ । कम्पनीले मंगलवार प्रेस वक्तव्य जारी गर्दै उक्त योजनाअन्तर्गत पोखराबाट भारतको विभिन्न गन्तव्यमध्ये शुरूमा नयाँदिल्ली, देहेरादुनमा सीधा उडान गर्ने तयारी भएको उल्लेख गरेको छ ।
पोखराबाट धवलागिरिदेखि सगरमाथासम्मको हिमशृंखला दृश्यावलोकन उडान तथा काठमाडौं र अन्य शहरहरूसँग आवश्यकताअनुसारको दैनिक सीधा उडानहरू गर्ने कम्पनीले उल्लेख गरेको छ ।
पोखरा अन्तरराष्ट्रिय एयरपोर्टको पूर्वाधारमा ‘ट्याक्सी–वे’लाई धावनमार्गको एकातर्फबाट मात्र जोडिएको हुँदा हाल सञ्चालनमा रहेको विमानस्थलभन्दा थोरै उडान हुने पनि कम्पनीले उल्लेख गरेको छ ।
हाल निर्माणाधीन विमानस्थलको पूर्व/पश्चिम धावनमार्गको पश्चिम धावनमागलाई मात्र अन्त्यसम्म ‘ट्याक्सी–वे’ ले जोडिएको छ । पश्चिमको ठूलो डाँडाका कारण विमान अवतरण पूर्वबाट मात्र सम्भव छ । तर, पूर्वको धावनमार्गलाई ‘ट्याक्सी–वे’ ले जोडिएको छैन ।
यसैकारण विमानहरू उडान गर्नुपर्दा पश्चिमबाट मात्र सम्भव भएको भन्दै बुद्धले यसबाट ‘हवाई ट्राफिक’ बढ्न गई स्वतः कम उडान हुने कम्पनीका मार्केटिङ निर्देशक रूपेश जोशीले जानकारी दिए ।
उनले भने, ‘अहिले धावनमार्ग र ‘ट्याक्सी–वे’ को निर्माण सिमेन्ट कंक्रिटले भइरहेको छ, अब बाँकी ‘ट्याक्सी–वे’ निर्माण गर्दा प्रक्रिया लम्बिने र निर्माण खर्च पनि महँगिने हुँदा विशेषज्ञको सल्लाह लिई अलकत्राको पिच मात्र गरे पुग्छ ।’ राष्ट्रिय गौरवको उक्त विमानस्थलको ७० प्रतिशत निमार्ण कार्य सम्पन्न भइसकेको छ ।
