काठमाडौं । काठमाडौंमा ४ दिने राष्ट्रिय कफी सम्मेलन तथा प्रदर्शनी २०८० जारी छ । नेपालमा पहिलो पटक आयोजना गरिएको सम्मेलनले कफीको क्षेत्रमा लगानी भित्र्याउने र नेपाली कफी विस्तार गर्नेबारेमा छलफल गर्नेछ ।
उद्योग, वाणिज्य तथा आपूर्ति मन्त्रालय, कृषि तथा पशुपंक्षी विकास मन्त्रालय, राष्ट्रिय चिया तथा कफी विकास बोर्ड, नेपाल पर्यटन बोर्ड, युरोपियन युनियन व्यापार तथा लगानी परियोजना र इन्टरनेशनल ट्रेड सेन्टरको सहकार्य एवं समन्वयमा सम्मेलन आयोजना भएको हो ।
नेपाल कफी व्यवसायी महासंघका अध्यक्ष ओमनाथ अधिकारीले कफी सम्मेलन नेपालमै पहिलो पटक भएको बताए । ‘यो कफी सम्मेलन पहिलो नेशनल कफी च्याम्पियन हो र यसको एग्जिबिशन पनि छ । यहाँ देशका विभिन्न जिल्लामा उत्पादन भएका कफी राखिएका छन्,’ उनले भने ।
सम्मेलनले युवाहरूलाई कफी व्यवसायको क्षेत्रमा लाग्न प्रेरित गरेको र यसबाट आन्तरिक बजारलाई प्रवद्र्धन गरेको उनको भनाइ छ । सम्मेलनमा कफी उत्पादनमा जोड दिन र उत्पादनमा रहेका कमजोरीलाई समाधान गर्न पनि छलफल गरिने उनले बताए ।
सम्मेलनमा देशका ३० ओटा जिल्लाका कफी उत्पादकहरू सहभागी छन् । कफीको प्रवर्द्धनका लागि आयोजकले विभिन्न विधामा प्रतिस्पर्धा गराउने बताएको छ ।
प्रतिस्पर्धाबाट उत्कृष्ट चुनिएकाहरूले स्वदेशमा मात्र नभई विदेशमा पनि आफ्नो कला प्रस्तुत गर्न मद्दत पुग्ने आयोजकको भनाइ छ । मेलामा सहभागी व्यवसायी तथा कफी उत्पादकहरूले मेलाले आफ्ना ग्राहकहरूसमक्ष पुग्न सहज माध्यम बनेको बताए । यस्ता सम्मेलनले उपभोक्तासम्म आफूलाई जोड्न र बजार व्यवस्थापनमा टेवा पुग्ने उनीहरूको विश्वास छ ।
काठमाडौको नयाँबजारस्थित सासा बैंक्वेटमा शनिवारबाट शुरु भएको सम्मेलन असार ५ गतेसम्म चल्नेछ ।
