पोखरा । पोखरा महानगरपालिकालाई भगिनी सम्बन्ध रहेको चीनको नानिङ शहरले २० लाख रुपैयाँ बराबरको स्वास्थ्य सामग्री प्रदान गरेको छ । पोखरा पर्यटन परिषद् र चाइना ओभरसिज एशोसिएशनको समन्वयमा ल्याइएको उक्त सामग्री सोमवार महानगर कार्यालय परिसरमा परिषद्का अध्यक्ष गोपीबहादुर भट्टराईले उपप्रमुख मञ्जुदेवी गुरुङलाई हस्तान्तरण गरे । उपप्रमुख गुरुङले महानगरपालिकाले स्थापित गरेको १३ अन्तरराष्ट्रिय सम्बन्धमध्ये ९ चीनका विभिन्न शहरसँग भएको जानकारी दिइन् । २०७४ पुस २६ गते महानगरपालिका र चीनको नानिङ शहरबीच भगिनी सम्बन्ध रहेको भन्दै उनले प्राप्त सामग्रीले महामारी रोकथाम र नियन्त्रणमा निकै सहयोग पुग्ने विश्वास व्यक्त गरिन् । रासस
