आफूखुसी खर्च गर्ने, उपभोक्ताका नाममा नियमविपरीत कार्यकर्तालाई योजना दिने, आर्थिक वर्ष सकिने बेला हतारमा खर्च गर्ने र अनुगमनकारी निकायले नै योजनाको काम गर्ने परिपाटी लुम्बिनी प्रदेशमा धेरै छ । यही कारण बर्सेनि बेरुजु रकमको ग्राफ उकालो लागिरहेको छ । सरकारले अनियमितता गर्नेबाट रकम असुलउपर गर्ने र बेरुजु फर्स्यौट गर्ने काममा ध्यान दिएको पाइँदैन । आर्थिक वर्ष ०७४/०७५ देखि आर्थिक वर्ष ०७७/०७८ सम्ममा प्रदेश सरकारको बेरुजु रकम १ अर्ब ७० करोड ६७ लाख ४० हजार रुपैयाँ पुगेको छ ।