सिड्नी (अष्ट्रेलिया) । सन् २०१९ मा अष्ट्रेलियामा प्रधानमन्त्रीका रुपमा स्कट मरिसनको जित चमत्कार थियो । मरिसन आफैंले हार्छु भनेर प्रक्षेपण गरेको चुनावमा उनले जित हात पारेका थिए ।
तर अहिले चाँहि मरिसनलाई चमत्कार अभाव भएको देखिएको छ । अर्थात् हालै भएको निर्वाचनमा मतदाताहरुले कन्जर्भेटिभ दल लिबरल नेशनल गठबन्धनको विपक्षमा मत दिएका छन् ।
पछिल्लो निर्वाचनमा कन्जर्भेटिभ दलले ५२ सिटमा मात्रै जित हात पारेको छ । उता, विपक्षी दल लेबरले बहुमत प्राप्त गरेको छ । तर ७२ सिटमा जित हात पारेको लेबरले स्पष्ट बहुमत भने पाएको छैन । योसँगै विपक्षी नेता एन्थोनी अल्बानिज प्रधानमन्त्री बन्ने निश्चित भएको छ । पछिल्लो निर्वाचनमा बेहोरेको हार मरिसनले स्वीकार पनि गरिसकेका छन् ।
कोरोना भाइरसको महामारी नियन्त्रण र महामारीबाट अर्थतन्त्र उकास्न सरकारले पाएको सफलताले देशमा संकट आएको समयमा मरिसनको अनुपस्थिति लगायत अन्य कारणलाई जित्न सकेन । जसले गर्दा पछिल्लो चुनावमा मरिसनले हार बेहोर्नु परेको विश्लेषकहरु बताउँछन् ।
देशमा आपत पर्दा, जनतालाई उनको आवश्यकता धेरै भएको समयमा मरिसन गायब थिए । सन् २०२० को शुरुमा अष्ट्रेलिया विनाशकारी डढेलोको चपेटामा आएको थियो । त्यति बेला डढेलो नियन्त्रणलाई प्राथमिकतामा राख्नुको सट्टा उनले आफ्नो बिदालाई महत्व दिए । डढेलो फैलिएर कयौंले ज्यान गुमाउँदा मरिसन हवाईमा बिदा मनाउन मस्त थिए ।
आलोचना चर्किएपछि उनी बीचमै फर्किनु परेको थियो भने फर्किएपछि पनि डढेलो प्रभावित क्षेत्रको भ्रमणमा जाँदा स्थानीयहरुले उनलाई र्याख र्याख्ती पारेका थिए । एक जनाले मरिसनलाई म तिमीसँग हात मिलाउँदिन भने । अर्का एक जनाले मत नै पाउँदैनौं भनेका थिए भने मरिसकेको व्यक्ति अनि घर जलेर घरबार बिहिन भएकाहरुको बारेमा प्रश्न गर्नेहरु पनि टन्नै थिए ।
महिलामाझ मरिसनको अलोकप्रियता पनि हारको अर्को कारण भएको बताइएको छ । रक्षामन्त्रीको कार्यालयमा पूर्व महिला सरकारी कर्मचारी बलत्कृत भएको घटना सार्वजनिक भएपछि यौन उत्पीडनका सयौं घटनाहरु बाहिरिए । देशको संसद जस्तो ठाउँमै महिलाहरु असुरक्षित रहेको भन्दै सरकारविरुद्ध चर्को प्रदर्शन भयो । यस घटनामा आफ्नो दुई छोरीको कुरा गर्दै पीडितलाई आफ्नो छोरी ठानेर व्यवहार गर्ने भन्दै मरिसनले दिएको प्रतिक्रियाको पनि चर्को आलोचना भएको थियो ।
रुसले युक्रेनमाथि आक्रमण गरेपछि उत्पन्न चरम महँगी र इन्धनको भाउमा भएको चर्को वृद्धि पनि अर्को कारण थियो मरिसनको पतनको । महँगी नियन्त्रण गर्न सरकारले ब्याजदर बढायो । यसले गर्दा धितोमा ऋण लिएकाहरु त मारमा परे नै पहिलो पटक घर किन्न लागेकोहरु पनि प्रभावित भए ।
चुनावी अभियान चलिरहेकै समयमा सरकारको सो निर्णय मरिसनका लागि खराब साबित भयो । मरिसनले आफूलाई जनतालाई चाहिएको जस्तो नेता देखाउन मात्रै खोजे, तर वास्तवमा उनी त्यस्तो थिएनन् । आफ्नो कार्यकालको अन्त्यतिर उनले जनताको मर्म बुझ्न थालेको जस्तो देखिएको थियो ।
यस पटक पनि जनताले मत दिए आफू सच्चिने भनेर उनले बताएका पनि थिए । तर जनताले उनलाई विश्वास गरेनन् । फलतः जनताले अर्को ३ वर्षका लागि नयाँ नेतृत्व चयन गरेको छ । लेबरले ९ वर्षपछि पुनः सरकार बनाउन पाएको छ भने ३ कार्यकालदेखि शक्तिमा रहेको लिबरल नेसनल गठबन्धन सत्ताबाट बाहिरिने भएको छ ।
