विराटनगर । क्षेत्रीयस्तरको विराटनगर विमानस्थल निर्माण गर्न रोक्का गरिएको स्थानीयको जमीनको मुआब्जा सरकारले दिन नसक्ने संस्कृति, पर्यटन तथा नागरिक उड्डयनमन्त्री मन्त्री प्रेम आलेले बताएका छन् । विराटनगरमा शुक्रवारदेखि शुरू भएको ‘विराट ट्रेड एक्स्पो’को उद्घाटन समारोहलाई सम्बोधन गर्दै आलेले यस्तो बताएका हुन् । मन्त्रीको यो उद्घोषले विराटनगर विमानस्थल स्तरोन्नतिको योजना पछि धकेलिने देखिएको छ । राज्यले १६ अर्ब रुपैयाँ दिएर जग्गा किन्न नसक्ने बताए । ‘१६ अर्ब राज्यले दिन सक्ने सामथ्र्य अहिले छैन । १६ अर्ब दिएर जग्गा किन्न पनि सकिँदैन,’ मन्त्री आलेले भने, ‘तपाईंहरूले जग्गाको व्यवस्थापन मिलाउनुहोस् । वैदेशिक लगानी भित्र्यााएर होस् वा जुनसुकै मोडलमा भए पनि बजेटको व्यवस्थापन गरेर विमानस्थल बनाउनुपर्छ ।’
कार्यक्रममा सहभागी वक्ताहरूले विराटनगर विमानस्थल अन्तरराष्ट्रियस्तरको बनाउनुपर्ने भन्दै मन्त्रीलाई दबाब दिएका थिए । विराटनगर महानगरपालिकाका प्रमुख भीम पराजुलीले मन्त्री आलेकै पालामा विमानस्थल निर्माणको ठेक्का आह्वान भइसकेको र पछि रद्द हुँदा आफू दु:खी भएको बताएका थिए । त्यसको प्रतिउत्तर दिँदै आलेले तीन अर्बको टेन्डर रद्द हुनुमा आर्थिक स्रोत सुनिश्चित नहुनु प्रमुख कारण भएको बताए । कार्यक्रममा प्रदेश १ का स्वास्थ्यमन्त्री जयराम यादवले आगामी वैशाख ३० गते जनताले जनप्रतिनिधिको कामको मूल्यांकन गर्ने बताए । ‘जनताको बीचमा गरेका वाचा समयमै कार्यान्वयन गर्नुपर्दछ,’ यादवले भने ।
विराटनगर महानगरपालिका प्रमुख पराजुलीले विराटनगर विचार, राजनीति र क्रान्तिको शहर रहेको तर, आर्थिक समृद्धिको नेतृत्व गर्न नसकिएको बताए । ‘८–९ जना प्रधानमन्त्री, त्यति नै अर्थमन्त्री जन्माएको विराटनगरले आर्थिक समृद्धि पाएन,’ उनले भने ।